യുകെയിൽ കെയർ വിസയിലുള്ളവർക്ക് സ്‌പോൺസർഷിപ്പ് വാഗ്ദാനവുമായി സ്കോട്ട്ലൻഡ് ഫസ്റ്റ് മിനിസ്റ്റർ

Oct 14, 2025

സ്കോട്ട്ലൻഡ്: യുകെയിൽ കെയർ വിസയിലുള്ളവർക്ക് സ്‌പോൺസർഷിപ്പ് വാഗ്ദാനവുമായി സ്കോട്ട്ലൻഡ് ഫസ്റ്റ് മിനിസ്റ്റർ ജോൺ സ്വിന്നി. കുടിയേറ്റം നിയന്ത്രിക്കുന്നതിന് നിലവിലെ വിസ മാനദണ്ഡങ്ങളിൽ കാര്യമായ മാറ്റങ്ങളാണ് ബ്രിട്ടീഷ് സർക്കാർ വരുത്തിയിട്ടുള്ളത്. അതുകൊണ്ട് തന്നെ നിരവധി പേർക്കാണ് വിസകൾ പുതുക്കുന്നതിനോ വിസ മാറ്റങ്ങൾക്കോ കഴിയാതെ വരുന്നത്. ഇതിന് പരിഹാരമായി സ്കോട്ടിഷ് സർക്കാർ നൂറുകണക്കിന് വിദേശ പരിചരണ തൊഴിലാളികളെ യുകെയിൽ തുടരാൻ സഹായിക്കുമെന്ന് ജോൺ സ്വിന്നി പറഞ്ഞു.

സ്കോട്ട്ലൻഡിലെ പ്രായമായ ആളുകൾക്ക് ബ്രിട്ടീഷ് സർക്കാരിന്റെ പുതിയ മാനദണ്ഡങ്ങളിൽ വില നൽകേണ്ടിവന്നത് അന്യായമാണെന്നും, തന്റെ സർക്കാർ ഏകദേശം £500,000 ചിലവിൽ കെയർ ഹോമുകളിൽ ജോലി ചെയ്യേണ്ട തൊഴിലാളികൾക്കുള്ള വിസ അപേക്ഷകൾ സ്പോൺസർ ചെയ്യുമെന്നും ഫസ്റ്റ് മന്ത്രി പറഞ്ഞു. കുടിയേറ്റത്തെച്ചൊല്ലി വർദ്ധിച്ചുവരുന്ന പിരിമുറുക്കങ്ങളോട് പ്രതികരിക്കാനുള്ള ശ്രമത്തിൽ, ആ ജോലികൾക്കുള്ള വിസയിലേക്കുള്ള പ്രവേശനം വളരെയധികം നിയന്ത്രിക്കാനുള്ള യുകെ സർക്കാരിന്റെ തീരുമാനം ദോഷകരമായെന്ന് സ്വിന്നി വിശേഷിപ്പിച്ചു.

യുകെയിൽ ആയിരക്കണക്കിന് കെയർ തൊഴിലാളികൾ നിയമപരമായി ജോലി ചെയ്യാൻ കഴിയാത്ത അവസ്ഥയിലാണ്, അതേസമയം കെയർ ഹോമുകൾ ജീവനക്കാരുടെ അഭാവം മൂലം അരക്ഷിതാവസ്ഥയിലാണെന്നും അബർഡീനിൽ നടന്ന സ്കോട്ടിഷ് നാഷണൽ പാർട്ടിയുടെ വാർഷിക സമ്മേളനത്തിൽ അദ്ദേഹം പറഞ്ഞു.