ജെയിംസ് ജോസും സ്റ്റം സെല്‍ ഡൊണേഷനെ കുറിച്ചുള്ള ആശങ്കകളും

ലോറന്‍സ് പെല്ലിശ്ശേരി, ഗ്ലോസ്‌റ്റെര്‍ഷെയര്‍ മലയാളി അസ്സോസിയേഷന്‍

ബ്രിസ്‌റ്റോളില്‍ നിന്നുള്ള യൂണിവേഴ്‌സിറ്റി വിദ്യാര്‍ത്ഥി ജെയിംസ് ജോസിനെ കുറിച്ച് ഇതിനോടകം എല്ലാവരും അറിഞ്ഞു കാണും. യുവത്വത്തിലേക്ക് കാലെടുത്തു വച്ചിട്ടുള്ള ജയിംസിന്റെ ജീവന്‍ നില നിര്‍ത്താന്‍, അനുയോജ്യരായ സ്റ്റം സെല്‍ ദാതാക്കളെ അന്വേഷിച്ചുള്ള നെട്ടോട്ടത്തിലാണ് അദ്ദേഹത്തിന്റെ അച്ഛന്‍ ജോസും അമ്മ ഗ്രേസിയും സഹോദരന്‍ ജോയലും. സോഷ്യല്‍ മീഡിയയില്‍ ഈയൊരു വാര്‍ത്ത സജീവമാണെങ്കിലും നമ്മുടെയൊക്കെ നിസ്സംഗത എന്നത്തേയും പോലെ ഇവിടെയും ആവര്‍ത്തിക്കപ്പെടുന്നു. രക്ത ദാനം പോലെ തന്നെ ഡോണര്‍ക്ക് ഒരു വിധ ശാരീരിക പ്രശ്‌നങ്ങളുമില്ലാതെ, സ്റ്റം സെല്‍ ഡൊണേഷന്‍ വഴി ജെയിംസിനെ രക്ഷിക്കാന്‍ ആധുനിക വൈദ്യ ശാസ്ത്രം ഇന്ന് സജ്ജമാണ് എന്നുള്ളത് നമ്മള്‍ സൗകര്യപൂര്‍വ്വം വിസ്മരിക്കുന്നു.

സ്വന്തം മകനോ മകള്‍ക്കോ മറ്റു വേണ്ടപ്പെട്ടവര്‍ക്കോ ഈയൊരു സാഹചര്യം വരുന്നതിനെ കുറിച്ച് ചിന്തിക്കാന്‍ പോലും നമുക്കൊക്കെ ബുദ്ധിമുട്ടാണ്. പക്ഷെ, ഓര്‍ക്കാപ്പുറത്തു വന്നു ചേര്‍ന്ന ആ ഒരു വിഷമ ഘട്ടത്തിലാണ് ജെയിംസും കുടുംബവും. അനുയോജ്യരായ സ്റ്റം സെല്‍ ഡോണറെ ലഭിക്കുക എന്നുള്ളതാണ് ജെയിംസും കുടുംബവും ഇന്ന് നേരിടുന്ന ഏറ്റവും വലിയ വെല്ലുവിളി. പക്ഷെ ആ വെല്ലുവിളി ഏറ്റെടുക്കാന്‍ നാമോരോരുത്തരും തയ്യാറാണെങ്കില്‍ ആരോഗ്യവാനായ ജെയിംസിനെ നമുക്ക് തിരികെ ലഭിക്കും എന്നതാണ് വസ്തുത. എങ്കിലും സ്റ്റം സെല്‍ ഡൊണേഷനുമായി ബന്ധപ്പെട്ട ചില ആശങ്കകളും സംശയങ്ങളുമാകാം നമ്മളെ ഇതില്‍ നിന്നും അകറ്റി നിര്‍ത്തുന്നത്.

എന്‍. എച്ച്. എസ് ഡെലീറ്റ് ബ്ലഡ് ക്യാന്‍സറും, യു.കെ യില്‍ ഈ രംഗത്ത് പ്രവര്‍ത്തിക്കുന്ന ഉപഹാര്‍ എന്ന സംഘടനയും ജെയിംസിന് വേണ്ടി ശുഭാപ്തി വിശ്വാസത്തോടെ തന്നെ സജീവമായി രംഗത്തുണ്ട്. ഉപഹാറിന്റെ ട്രയിന്റ് വോളന്റിയര്‍ എന്ന നിലയില്‍ മനസ്സിലാക്കിയ ചില പ്രാഥമിക വിവരങ്ങള്‍ നിങ്ങളുമായി പങ്കു വക്കാനും സ്റ്റം സെല്‍ രജിസ്‌ട്രേഷനും ഡൊണേഷനും എത്ര മാത്രം ലളിതമാണ് എന്ന് വിശദീകരിക്കാനുമുള്ള ഒരു എളിയ ശ്രമം മാത്രമാണിത്.

ഉപഹാറിനോപ്പം യുക്മ റാപ്പിഡ് റെസ്‌പോണ്‍സ് ടീമും ചേര്‍ന്ന് പ്രവര്‍ത്തിക്കുന്ന ഈ പരിപാടിയില്‍ ഇതിനകം തന്നെ നിരവധി അംഗ അസ്സോസിയേഷനുകളാണ് താത്പര്യമെടുത്ത് മുന്നോട്ട് വന്നിട്ടുള്ളത്. അസ്സോസിയേഷനുകളില്‍ നടക്കുന്ന ഈസ്റ്റര് വിഷു ആഘോഷ വേളകളില്‍ ഉപഹാറിന്റെയും യുക്മയുടെയും വോളന്റിയര്‍മാര്‍ നേരിട്ടെത്തി സ്റ്റം സെല്‍ ശേഖരിക്കുന്നതിനുള്ള നടപടിക്രമങ്ങളാണ് നടക്കുന്നത്.ഏപ്രില്‍ 22 ന് മാഞ്ചസ്റ്റര്‍, സാല്‍ഫോര്‍ഡ്, സെയില്‍, ക്രോയ്‌ഡോണ്‍, മില്‍ട്ടണ്‍ കെയ്ന്‍സ്എന്നിവിടങ്ങളിലും, ഏപ്രില്‍ 23ന് സാലിസ്ബറി, മാഞ്ചസ്റ്റര്‍, ഗ്ലോസ്‌റ്റെര്‍ഷെയര്‍ എന്നിവിടങ്ങളിലും ഏപ്രില്‍ 29 ന് ഹള്ളിലും, ഏപ്രില്‍ 30ന് സൗത്താംപ്ടണ്‍, ലീഡ്‌സ്, കോള്‍ചെസ്റ്റര്‍ തുടങ്ങിയ സ്ഥലങ്ങളിലുമാണ് സ്റ്റം സെല്‍ ശേഖരണത്തിനുള്ള ക്രമീകരണങ്ങള്‍ നടത്തിയിട്ടുള്ളത്.

സ്റ്റം സെല്‍ ഡോണര്‍ രജിസ്‌ട്രേഷന്‍:

18 നും 55 നും ഇടയില്‍ പ്രായമുള്ളവര്‍ക്ക് ഇതിനായി രജിസ്റ്റര്‍ ചെയ്യാവുന്നതാണ് (17 വയസ്സ് മുതല്‍ പ്രീ രജിസ്‌ട്രേഷന്‍ സാധ്യമാണ്).

പൊതുവില്‍ ആരോഗ്യമുള്ളവരും 50 കിലോക്ക് മുകളില്‍ തൂക്കമുള്ളവരുമായിരിക്കണം.

രജിസ്റ്റര്‍ ചെയ്യുന്നതിനായി നിങ്ങളുടെ വ്യക്തിഗത വിവരങ്ങള്‍ അടങ്ങിയ ഫോം പൂരിപ്പിക്കേണ്ടതാണ്.

നിങ്ങള്‍ക്ക് നല്‍കപ്പെടുന്ന കോട്ടണ്‍ ബഡ്‌സ് (സ്വാബ്‌സ്) നിങ്ങളുടെ വായില്‍ രണ്ടു കവിളുകളിലും 30 സെക്കന്റോളം ഉരസിയതിന് ശേഷം പ്രത്യേകമായുള്ള പോസ്റ്റല്‍ കവറില്‍ നിക്ഷേപിക്കുക. ടെസ്റ്റിന് വേണ്ടിയുള്ള സലൈവ എടുക്കുന്നതിനു വേണ്ടിയാണിത്.

പൂരിപ്പിച്ച നിങ്ങളുടെ ഫോമും സ്വാബ്‌സ് അടങ്ങിയ കവറും ഡെലീറ്റ് ബ്ലഡ് ക്യാന്‍സറിന് അയച്ചു കൊടുക്കുന്നു.

സ്വാബ്‌സിന്റെ പ്രത്യേകമായ ലാബിലുള്ള ടെസ്റ്റുകള്‍ക്ക് ശേഷം രജിസ്‌ട്രേഷന്‍ പൂര്‍ത്തിയായ വിവരം സാധാരണ ഗതിയില്‍ മൂന്നോ നാലോ ആഴ്ചകള്‍ക്കുള്ളില്‍ നിങ്ങളെ അറിയിക്കുന്നു.

രജിസ്‌ട്രേഷന് ശേഷം ഏതു ഘട്ടത്തിലും നിങ്ങള്‍ക്ക് അത് കാന്‍സെല്‍ ചെയ്യാവുന്നതാണ്.

രജിസ്‌ട്രേഷന് ശേഷം നിങ്ങള്‍ ഒരു ഡോണര്‍ ആകുക എന്നുള്ളത് ലോട്ടറി ലഭിക്കുന്നതിന് തുല്യമായാണ് കണക്കാക്കുന്നത്. കാരണം, നിങ്ങള്‍ മറ്റൊരാള്‍ക്ക് രണ്ടാം ജന്മത്തിനുള്ള സാഹചര്യം ഒരുക്കുന്നു. പിന്നെ, ഇങ്ങനെ സ്റ്റം സെല്‍ യോജിച്ചു വരുന്നത് പതിനായിരത്തിലോ ചിലപ്പോള്‍ ലക്ഷത്തിലോ ഒരാള്‍ക്ക് മാത്രമാണ്.

യു.കെ യില്‍ തദ്ദേശീയരായവര്‍ 59 ശതമാനത്തോളം പേര്‍ സ്റ്റം സെല്‍ ഡൊണേഷന് വേണ്ടി രജിസ്റ്റര്‍ ചെയ്തിട്ടുള്ളപ്പോള്‍ ഇവിടെയുള്ള ഏഷ്യക്കാരായവരില്‍ രജിസ്റ്റര്‍ ചെയ്തിട്ടുള്ളത് വെറും 4 ശതമാനമാണ് എന്നുള്ളത് ഇവിടെ ചേര്‍ത്ത് വായിക്കേണ്ടതാണ്. സ്റ്റം സെല്‍ ഡൊണേഷന്‍ നമ്മുടെ എത്‌നിക് ഒറിജിനുമായി ഏറെ ബന്ധപ്പെട്ടു കിടക്കുന്നതിനാല്‍, ജെയിംസിന് സൗത്ത് ഇന്ത്യക്കാരായവരുടെ സ്റ്റം സെല്‍ ആണ് കൂടുതല്‍ അനുയോജ്യമാകുന്നത് എന്നത് ഇതിന്റെയൊക്കെ ആക്കം വര്‍ധിപ്പിക്കുന്നു. അവിടെയാണ് നമ്മളോരോരുത്തരും ഇതിനായി രജിസ്റ്റര്‍ ചെയ്യേണ്ടതിന്റെ ആവശ്യകത പ്രബലമാകുന്നതും.

ഒരു ഡോണറാകാനുള്ള അപ്പൂര്‍വ ഭാഗ്യം നിങ്ങളെ തേടിയെത്തിയാല്‍:

ഡൊണേഷനുമായി മുന്നോട്ടു പോകാന്‍ തയ്യാറാണെങ്കില്‍ ഡോണറുടെ ശാരീരിക ക്ഷമത ഉറപ്പ് വരുത്താന്‍ ആവശ്യമായ പ്രാഥമിക ടെസ്റ്റുകള്‍ ഉണ്ടായിരിക്കും, അതനുസരിച്ചായിരിക്കും തുടര്‍ നടപടികള്‍.

സ്റ്റം സെല്‍ ഡൊണേഷന് നിങ്ങളെ പ്രാപ്തമാക്കുന്നതിന് ആവശ്യമായ നാല് ഇഞ്ചക്ഷനുകള്‍ അതിനു മുന്നോടിയായി ഉണ്ടായിരിക്കും.

ബ്ലഡ് എടുക്കുന്ന അതെ രീതിയാണ് ഇവിടേയും അവലംബിക്കുന്നത്. പക്ഷെ, സ്റ്റം സെല്‍ ഫില്‍റ്റര്‍ ചെയ്ത് എടുക്കുന്നതോടൊപ്പം, ബ്ലഡ് നമ്മുടെ ശരീരത്തിലേക്ക് തന്നെ റിട്ടേണ്‍ ചെയ്യപ്പെടുന്നു.

നമ്മുടെ ശരീരത്തില്‍ നിന്ന് എടുക്കപ്പെട്ട സ്റ്റം സെല്‍ മൂന്നോ നാലോ ആഴ്ചകള്‍ക്കുള്ളില്‍ തന്നെ സ്വാഭാവികമായി വീണ്ടും ഉല്‍പ്പാദിപ്പിക്കപ്പെടുന്നു.

ട്രാന്‍സ്പ്ലാന്റ് ചെയ്യപ്പെട്ട രോഗിയിലും ഇതേ കാലയളവില്‍ കൂടുതല്‍ ആരോഗ്യകരമായ സ്റ്റം സെല്‍ ഉല്‍പ്പാദിപ്പിക്കപ്പെടുകയും, ഒപ്പം സാധാരണ ജീവിതത്തിലേക്ക് മടങ്ങി വരികയും ചെയുന്നു.

സ്റ്റം സെല്‍ ഡൊണേഷന് ശേഷം ജോലിയിലേക്ക് തിരിച്ചു പോകാന്‍ രണ്ടു ദിവസത്തെ വിശ്രമം അനുവദിക്കുന്ന ഡോണര്‍ക്ക് ഒരു വിധ തുടര്‍ ചികിത്സകളോ ടെസ്റ്റുകളോ സാധാരണ ഗതിയില്‍ വേണ്ടി വരുന്നില്ല.

നിങ്ങള്‍ക്കും സഹായത്തിനായി കൂടെ വരുന്ന ഒരാള്‍ക്കും, സ്റ്റം സെല്‍ ഡൊണേഷനുമായി ബന്ധപെട്ടു ജോലി സ്ഥലത്തു നിന്നുള്ള അവധിക്കും യാത്രക്കും താമസ സൗകര്യത്തിനും ഭക്ഷണത്തിനും മറ്റും വേണ്ടി വരുന്ന ചിലവുകള്‍ എല്ലാം ഡെലീറ്റ് ബ്ലഡ് ക്യാന്‍സര്‍ വഹിക്കുന്നു.

ഒരു പക്ഷെ ജയിംസിന്റെ ജീവന്‍ രക്ഷിക്കാനുള്ള നിയോഗം നമ്മളില്‍ ആര്‍ക്കെങ്കിലുമായിരിക്കാം. അതിന് ആദ്യം ചെയ്യേണ്ടത് സ്റ്റം സെല്‍ ഡൊണേഷന് വേണ്ടി രജിസ്റ്റര്‍ ചെയ്യുക എന്നതാണ്. ഇതിനോടകം നിങ്ങള്‍ രജിസ്റ്റര്‍ ചെയ്തിട്ടുള്ളതാണെങ്കില്‍ ഗിഫ്റ്റ് ഓഫ് ലൈഫ് എന്ന മഹത് സന്ദേശത്തിന്റെ പ്രചാരകരാകാനും, ഉപഹാറിന്റെ നേതൃത്വത്തില്‍ യു.കെ യില്‍ മിക്കയിടങ്ങളിലും സംഘടിപ്പിച്ചു വരുന്ന കാമ്പെയിനുകളില്‍ പങ്കാളികളാകാനുമുള്ള ആഹ്വാനം നമുക്കോരോരുത്തര്‍ക്കും ഏറ്റെടുക്കാം.

ജെയിംസിനെ സംബന്ധിച്ച് ഇനിയുള്ള ഓരോ നിമിഷവും വിലപ്പെട്ടതാണ് – ജെയിംസിനെ നിങ്ങള്‍ നെഞ്ചോട് ചേര്‍ക്കുന്നുവെങ്കില്‍ അത് ഉടനെ തന്നെ വേണം. അങ്ങനെയെങ്കില്‍, ജീവിതം ഒരു ചോദ്യ ചിഹ്ന്‌നമായി മാറിയ ജെയിംസിനും കുടുംബത്തിനുമൊപ്പം പ്രത്യാശയോടെ നമുക്കും പങ്കു ചേരാം.