1 GBP = 125.11
Logos
breaking news

ലോകപര്യടനത്തിനിറങ്ങിയ ആഡംബര കപ്പൽ സിംഗപ്പൂരിൽ പിടിച്ചെടുത്തു; യാത്രക്കാർ പ്രതിസന്ധിയിൽ

  • Nov 10, 2026
ലോകപര്യടനത്തിനിറങ്ങിയ ആഡംബര കപ്പൽ സിംഗപ്പൂരിൽ പിടിച്ചെടുത്തു; യാത്രക്കാർ പ്രതിസന്ധിയിൽ

സിംഗപ്പൂർ: സാമ്പത്തിക പ്രതിസന്ധിയെ തുടർന്ന് യാത്രക്കാർക്ക് യാത്ര പാതിവഴിയിൽ അവസാനിപ്പിക്കേണ്ടിവന്ന ലോകപര്യടന കപ്പൽ ‘ദി ഒഡീസി’ സിംഗപ്പൂരിൽ അധികൃതർ പിടിച്ചെടുത്തു. കോടതി ഉത്തരവിന്റെ അടിസ്ഥാനത്തിലാണ് കപ്പൽ സിംഗപ്പൂർ തുറമുഖത്ത് തടഞ്ഞുവെച്ചിരിക്കുന്നത്. കപ്പലിലെ ജീവനക്കാർ സുരക്ഷിതരാണെന്നും അവരുടെ ക്ഷേമകാര്യങ്ങൾ കപ്പലിന്റെ ഉടമസ്ഥരുടെ നേതൃത്വത്തിൽ കൈകാര്യം ചെയ്യുന്നുണ്ടെന്നും സിംഗപ്പൂർ തുറമുഖ അതോറിറ്റി അറിയിച്ചു.

അമേരിക്കൻ കമ്പനിയായ വില്ലാ വൈ റെസിഡൻസസിന്റെ ഉടമസ്ഥതയിലുള്ള ഒഡീസി 2024 ഒക്ടോബറിൽ ബെൽഫാസ്റ്റിൽ നിന്നാണ് ലോകപര്യടനം ആരംഭിച്ചത്. മൂന്നര വർഷംകൊണ്ട് 150 രാജ്യങ്ങൾ സന്ദർശിക്കാനായിരുന്നു പദ്ധതി. എന്നാൽ ഇന്ധനവിലയിലുണ്ടായ അസാധാരണ വർധനവ് ഉൾപ്പെടെയുള്ള സാമ്പത്തിക പ്രതിസന്ധികളെ തുടർന്ന് കമ്പനി പ്രവർത്തനങ്ങൾ പെട്ടെന്ന് നിർത്തിവെക്കുകയായിരുന്നു.

ഇതോടെ കഴിഞ്ഞ മാസം കംബോഡിയയിലെ സിഹാനൂക്വിൽ തുറമുഖത്ത് എത്തിയ കപ്പലിലെ ഏകദേശം 200 യാത്രക്കാർക്ക് കപ്പൽ വിട്ടിറങ്ങേണ്ടിവന്നു. യാത്രക്കാർക്ക് താൽക്കാലിക താമസസൗകര്യങ്ങൾ കണ്ടെത്തുന്നതിനുള്ള നടപടികൾ സ്വീകരിച്ചുവരികയാണെന്ന് കമ്പനി അറിയിച്ചിരുന്നു.

കപ്പലിൽ സ്ഥിരതാമസത്തിനായി ക്യാബിനുകൾ സ്വന്തമാക്കുന്നതിനും അഞ്ചുവർഷത്തെ താമസസൗകര്യം തിരഞ്ഞെടുക്കുന്നതിനും ഏതാനും ദിവസത്തേക്കുള്ള യാത്രകൾക്കായി ക്യാബിനുകൾ വാടകയ്ക്കെടുക്കുന്നതിനുമുള്ള അവസരമാണ് കമ്പനി ഒരുക്കിയിരുന്നത്. സ്ഥിരതാമസത്തിനുള്ള ക്യാബിനുകൾക്ക് 1.20 ലക്ഷം മുതൽ 4.40 ലക്ഷം ഡോളർ വരെയായിരുന്നു വില. പ്രതിമാസ വാടക 3,500 ഡോളർ മുതലായിരുന്നു.

എന്നാൽ തുടക്കം മുതൽ തന്നെ നിരവധി പ്രതിസന്ധികളാണ് ഈ ലോകപര്യടന പദ്ധതിയെ പിന്തുടർന്നത്. അറ്റകുറ്റപ്പണികളും ആവശ്യമായ രേഖകളുമായി ബന്ധപ്പെട്ട പ്രശ്നങ്ങളും കാരണം കപ്പലിന്റെ യാത്ര നാല് മാസം വൈകിയാണ് ആരംഭിച്ചത്. പിന്നീട് വിയറ്റ്നാമിൽ എത്തിയപ്പോൾ ഭക്ഷണവിതരണക്കാരന് കമ്പനി പണം നൽകാനുണ്ടായിരുന്നതിനാൽ ജീവനക്കാർക്ക് പ്രാദേശികമായി ഭക്ഷ്യവസ്തുക്കൾ വാങ്ങേണ്ടിവന്നതായും റിപ്പോർട്ടുകളുണ്ട്.

കമ്പനിയുടെ സാമ്പത്തിക പ്രതിസന്ധിയെക്കുറിച്ച് കഴിഞ്ഞ ഓഗസ്റ്റിൽ തന്നെ യാത്രക്കാരെ അറിയിച്ചിരുന്നതായി അമേരിക്കൻ മാധ്യമമായ സിബിഎസ് റിപ്പോർട്ട് ചെയ്തു. യാത്ര തുടരുന്നതിനായി യാത്രക്കാരിൽനിന്ന് അധിക തുക സമാഹരിക്കേണ്ടിവന്നതായും കപ്പൽ അധികൃതർ തടഞ്ഞുവെക്കപ്പെടാനുള്ള സാധ്യതയെക്കുറിച്ച് മുന്നറിയിപ്പ് നൽകിയിരുന്നതായും റിപ്പോർട്ടിൽ പറയുന്നു.

ഇന്ധനവില വർധനവിനെ തുടർന്ന് യാത്രക്കാർക്ക് അധിക ഇന്ധനച്ചെലവ് നൽകേണ്ടിവരുമെന്ന് അറിയിച്ചിരുന്നതായും യാത്രാപദ്ധതികൾ ഗണ്യമായി വെട്ടിക്കുറച്ചതായും യാത്രക്കാരിയായ ഹോളി ഹെന്നസി നേരത്തെ ബിബിസിയോട് വെളിപ്പെടുത്തിയിരുന്നു.

ഇറാൻ യുദ്ധത്തെ തുടർന്നുണ്ടായ ഇന്ധനവില വർധനവ് ഏഷ്യൻ മേഖലയിൽ ഒരു ക്യാബിനുമായി ബന്ധപ്പെട്ട പ്രതിമാസ ഇന്ധനച്ചെലവ് 1,800 ഡോളറിൽനിന്ന് 8,000 ഡോളർ വരെ ഉയർത്തിയതായി വില്ലാ വൈ റെസിഡൻസസ് ഒക്ടോബർ 27-ലെ പ്രസ്താവനയിൽ വ്യക്തമാക്കി. ഇന്ധന ഉപഭോഗം കുറയ്ക്കാൻ നിരവധി നടപടികൾ സ്വീകരിച്ചെങ്കിലും ചെലവിലെ അസാധാരണ വർധനവ് മറികടക്കാൻ കഴിഞ്ഞില്ലെന്നും കമ്പനി സമ്മതിച്ചു.

കംബോഡിയയിൽ യാത്ര അവസാനിപ്പിച്ചശേഷം ഈ മാസം വീണ്ടും സിംഗപ്പൂരിലെത്തിയ കപ്പലാണ് ഇപ്പോൾ കോടതി ഉത്തരവിനെ തുടർന്ന് പിടിച്ചെടുത്തിരിക്കുന്നത്. കപ്പൽ പിടിച്ചെടുക്കാൻ നിയമനടപടി സ്വീകരിച്ചിരിക്കുന്നത് ഏത് കക്ഷിയാണെന്ന കാര്യം ഇതുവരെ വ്യക്തമായിട്ടില്ല. സിംഗപ്പൂരിലെ ഹെൽംസ്‌മാൻ എൽഎൽസി എന്ന നിയമസ്ഥാപനമാണ് കേസിൽ നടപടികൾ സ്വീകരിക്കുന്ന അഭിഭാഷക സ്ഥാപനമായി ചുമതലയേറ്റിരിക്കുന്നത്.

ലോകം ചുറ്റിക്കാണുന്നതിനൊപ്പം കപ്പലിൽ തന്നെ സ്ഥിരതാമസമെന്ന സ്വപ്നവുമായി ലക്ഷങ്ങൾ മുടക്കിയ യാത്രക്കാർക്ക് സാമ്പത്തിക പ്രതിസന്ധിയും യാത്ര മുടങ്ങലും വലിയ തിരിച്ചടിയായിരിക്കുകയാണ്.

Latest News:

Post Your Comments Here ( Click here for malayalam )

Press Esc to close

click on malayalam character to switch languages

other news

1 2 3 … 4,586
More Videos
യുക്മ കേരളപൂരത്തിന് ആവേശം പകരാൻ സ്വാഗതഗാനം പുറത്തിറക്കി; ദേവലാൽ സഹദേവൻ ചിട്ടപ്പെടുത്തിയ ഗാനം സോഷ്യൽ മീഡിയയിൽ തരംഗമാകുന്നു
More Gallery
ലോകകപ്പ് വേദിയിൽ സുരക്ഷാ ആശങ്ക; ഇംഗ്ലണ്ട് ക്യാമ്പിന് സമീപം വെടിവെപ്പ്, 9 പേർക്ക് പരിക്ക്

Latest Updates

show more

uukma special

show more