തൃക്കുന്നത്തു സെഹിയോൻ പള്ളിയിൽ കൽക്കുരിശ് കൂദാശ ഭക്തിനിർഭരമായി നടന്നു; പരിശുദ്ധ ബാവാ മുഖ്യകാർമ്മികത്വം വഹിച്ചു

Jan 02, 2026

മൂവാറ്റുപുഴ: കുന്നയ്ക്കൽ ഈസ്റ്റ് തൃക്കുന്നത്തു സെഹിയോൻ സെന്റ് ജോർജ് ഓർത്തഡോക്സ് പള്ളിയിലെ പെരുന്നാൾ ആഘോഷങ്ങളോടനുബന്ധിച്ച് പണികഴിപ്പിച്ച സെന്റ് മേരീസ് കൽക്കുരിശിന്റെ കൂദാശ ഭക്തിനിർഭരമായി നടന്നു. 2025 ഡിസംബർ 31-ന് നടന്ന വിശുദ്ധ ചടങ്ങുകൾക്ക് മലങ്കര ഓർത്തഡോക്സ് സഭയുടെ പരമാധ്യക്ഷൻ പരിശുദ്ധ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവാ മുഖ്യകാർമ്മികത്വം വഹിച്ചു. അഭിവന്ദ്യ സഖറിയാസ് മാർ സേവേറിയോസ് മെത്രാപ്പോലീത്ത ചടങ്ങിൽ സന്നിഹിതനായിരുന്നു.

കുരുട്ടമ്പുറത്ത് ചെറിയാന്റെ സുവർണ്ണ ജൂബിലി സ്മാരകമായി പത്നി ചിന്നമ്മ ചെറിയാൻ സമർപ്പിച്ചതാണ് ഈ കൽക്കുരിശ്. നാലാം വയസ്സിൽ അന്തരിച്ച സിസിലി ചെറിയാന്റെ പാവന സ്മരണയ്ക്കായി നിർമ്മിക്കപ്പെട്ട ഈ കുരിശ്, വരുംതലമുറകൾക്ക് വിശ്വാസത്തിന്റെയും പ്രാർത്ഥനയുടെയും അടയാളമായി നിലകൊള്ളും.

നന്ദി അറിയിച്ച് ഡോ. ബേബി ചെറിയാൻ:
തന്റെ മാതാവ് സമർപ്പിച്ച കൽക്കുരിശിന്റെ കൂദാശ നിർവഹിച്ച പരിശുദ്ധ ബാവായ്ക്കും അഭിവന്ദ്യ മെത്രാപ്പോലീത്തയ്ക്കും യുകെ മലയാളിയും വ്യവസായിയുമായ ഡോ. ബേബി ചെറിയാൻ (ട്രഷറർ, ഒ.എസ്.എസ്.എ.ഇ – യുകെ, യൂറോപ്പ് & ആഫ്രിക്ക) ഹൃദയം നിറഞ്ഞ നന്ദി രേഖപ്പെടുത്തി.
തന്റെ സന്ദേശത്തിൽ അദ്ദേഹം ഇപ്രകാരം പറഞ്ഞു:
”ദൈവകൃപയാൽ ഈ വിശുദ്ധ ചടങ്ങ് കുരുട്ടമ്പുറത്ത് ചെറിയാന്റെ ജൂബിലി വർഷത്തിലെ ഒരു സുപ്രധാന നാഴികക്കല്ലാണ്. ഇതിന് നേതൃത്വം നൽകിയ വികാരിമാരായ ഫാ. ജോൺ കുര്യാക്കോസ്, ഫാ. ഗീവർഗീസ് ജോൺ, പെരുന്നാൾ കൺവീനർ കെ.ഐ. പൗലോസ് കാവിക്കുന്നേൽ, ട്രസ്റ്റി ജേക്കബ് ജോസ് വയലിക്കുടിയിൽ, സെക്രട്ടറി ദീപു ജോസ് പുതിയമഠത്തിൽ, കൽക്കുരിശ് കോർഡിനേറ്റർ ജിജോ മുപ്പത്തിയിൽ എന്നിവരോടുള്ള നന്ദിയും കടപ്പാടും അറിയിക്കുന്നു.”

പെരുന്നാൾ ശുശ്രൂഷകളിലും പ്രത്യേക പ്രാർത്ഥനകളിലും നിരവധി വിശ്വാസികൾ പങ്കെടുത്തു. പള്ളിയുടെ ചരിത്രത്തിലെ വലിയൊരു ആത്മീയ മുഹൂർത്തമായി ഈ ചടങ്ങ് മാറി.