മാഞ്ചസ്റ്റർ മലയാളി കൾച്ചറൽ അസോസിയേഷൻ്റെ ഓണാഘോഷം ജനപങ്കാളിത്തം കൊണ്ടും വേദിയെ ഇളക്കിമറിച്ചും വർണാഭമായി…. ഷിജോ വർഗീസ് ഉദ്‌ഘാടനം നിർച്ചഹിച്ചു….. വൈകിട്ട് അഡ്വ. എബി സെബാസ്‌റ്റ്യൻ മുഖ്യാതിഥിയായി വേദി കീഴടക്കി……ഫാഷൻ ഷോ, നൃത്തനൃത്യങ്ങൾ, സിനിമാ താരങ്ങൾ ഉൾപ്പെടെയുള്ള പ്രഗത്ഭ കലാകാരൻമാരുടെ മാസ്മരിക പ്രകടനങ്ങൾ….

യുകെയിലെ ആദ്യകാല മലയാളി സംഘടനയും പ്രമുഖ മലയാളി അസോസിയേഷനുകളിലൊന്നുമായ മാഞ്ചസ്റ്റർ മലയാളി കൾച്ചറൽ അസോസിയേഷൻ (എം എം സി എ) യുടെ ഓണാഘോഷ പരിപാടികൾ ജനപങ്കാളിത്തം കൊണ്ടും മികവാർന്ന കലാപരിപാടികൾ അവതരിപ്പിച്ച് കൊണ്ടും  വർണാഭമായി. നാട്ടിൽ നിന്നും എത്തിച്ചേർന്ന സിനിമാ താരങ്ങൾ ഉൾപ്പെടുന്ന പ്രഗത്ഭ കലാകരൻമാർ വേദിയെ ഇളക്കിമറിച്ചു കാണികളുടെ മനംകവർന്നു.

രാവിലെ 10 മണിക്ക് പൂക്കളമിട്ട് ആരംഭിച്ച ഓണഘോഷ പരിപാടികൾ കുട്ടികളുടെയും മുതിർന്നവരുടേയും രസകരമായ വിവിധ ഗെയിംസുകളുമായി മുന്നോട്ട് പോയി. ഉച്ചക്ക് 12 മണിയോടെ വിഭവസമൃദ്ധമായ ഓണസദ്യ ആരംഭിച്ചു. ലിവർപൂർ അക്ഷയ കാറ്ററിംഗ് ഒരുക്കിയ രുചികരമായ ഓണസദ്യയിൽ അഞ്ഞൂറോളം പേർ പങ്കെടുത്തു. 

വൈകിട്ട് 4 മണിക്ക് ആരംഭിച്ച പൊതുസമ്മേളനത്തിൽ എം എം സി എ പ്രസിഡൻ്റ് റോസ്ബാസ്‌റ്റ്യൻ അദ്ധ്യക്ഷ വഹിച്ചു. സെക്രട്ടറി ജയൻ ജോൺ സ്വാഗതം ആശംസിച്ച ചടങ്ങിൽ വിശിഷ്ടാതിഥിയായി പങ്കെടുത്ത യുക്മ നാഷണൽ ട്രഷറർ ഷീജോ വർഗീസ് നിലവിളക്ക് കൊളുത്തി ഓണാഘോഷ പരിപാടികൾ ഉദ്ഘാടനം ചെയ്തു. യുക്മ ചാരിറ്റി വൈസ് ചെയർമാൻ അലക്സ് വർഗീസ് ആശംസകൾ നേർന്നു. യുക്മ നോർത്ത് വെസ്റ്റ് റീജിയണൽ ജോയിൻ്റ് ട്രഷററും എം എം സി എ കമ്മിറ്റിയംഗവുമായ ജോസഫ് മാത്യു നന്ദിയും പ്രകാശിപ്പിച്ചു. പൊതുയോഗത്തിൽ വച്ച് വിവിധ മേഘലകളിൽ മികവ് തെളിയിച്ച ബിൻ്റോ സൈമൺ ലിയാ ജോബിൻസ് തുടങ്ങിയവരെയും യുക്മ വള്ളംകളിയിൽ ടീമുകൾക്ക് നേതൃത്വം നൽകിയ അഖിൽ ജോർജിനെയും ആദരിച്ചു. അംഗങ്ങളുടെ മക്കളിൽ ഈ വർഷം ഗ്രാജ്വേറ്റ് ചെയ്തവരെയും, എ ലെവൽ, ജി സി എസ് ഇ വിജയികളെയും വേദിയിൽ ആദരിച്ചു.

ഒരിടവേളയ്ക്ക് ശേഷം അംഗങ്ങളുടെ നിരന്തരമായ അഭ്യർത്ഥനമാനിച്ച് കമ്മിറ്റി തീരുമാനപ്രകാരം എം എം സി എ സ്‌കൂൾ ഓഫ് ഡാൻസിൻ്റെ ഉദ്ഘാടനവും ഓണാഘോഷ പരിപാടിയിൽ വേദിയിൽ ഭദ്രദീപം കൊളുത്തി ഉദ്ഘാടനം ചെയ്തു. ഡാൻസ് ടീച്ചർമാരും ഭാരവാഹികളും ചടങ്ങിൽ സംബന്ധിച്ചു. വേദിയിൽ ടീച്ചർമാരുടെ ഡാൻസ് പെർഫോർമൻസും ഉണ്ടായിരുന്നു.

തുടർന്ന്  എം എം സി എ കുടുംബാംഗങ്ങളുടെ വിവിധ കലാപരിപാടികൾ അരങ്ങേറി. കൾച്ചറൽ കോർഡിനേറ്റർമാരായ ജീനാ റോയ്, റിയാ അനീഷ്, അനീറ്റ ജിൻ്റോ, ജെയിൻ ജിൻ്റിൽ എന്നിവർ പരിപാടികൾക്ക് നേതൃത്വം നൽകി. റിയാ അനീഷ് , ജാസിം ഹംസ   എന്നിവരായിരുന്നു  പരിപാടികൾ ആങ്കർമാരായി വളരെ മനോഹരമായി നിയന്ത്രിച്ചത്. 

ഓണാഘോഷ പരിപാടിക്ക് ക്ഷണിച്ചപ്പോൾ തന്നെ സ്‌കോട്ലൻഡിൽ പരിപാടിയിൽ സംബന്ധിച്ച ശേഷം വൈകിട്ട് എത്താമന്നറിയിച്ച യുക്മയുടെ ആദരണീയനായ പ്രസിഡൻ്റ് അഡ്വ. എബി സെബാസ്‌റ്റ്യൻ 6 മണിക്ക് എത്തിച്ചേർന്നു. മുൻ എം എം സി എ പ്രസിഡൻ്റ് ജോബി മാത്യുവിൻ്റെ നേതൃത്വത്തിൽ ഭാരവാഹികളും യുക്മ പ്രസിഡൻ്റിനെ സ്വീകരിച്ചു. വൈകിയെത്തിയതിലുള്ള ക്ഷമാപണത്തോടെ ആരംഭിച്ച തൻ്റെ പ്രസംഗത്തിൽ നിലവിലെ ഭാരവാഹികളെയും മുൻ പ്രസിഡൻ്റുമാരെയും അനുസ്മരിച്ച് കൊണ്ട്, യുക്മ മാഞ്ചസ്റ്ററിൽ സംഘടിപ്പിച്ച എല്ലാ പരിപാടികളും ഏറ്റെടുത്ത് നടത്തി വൻ വിജയമാക്കിയതിൽ എം എം സി എയുടെ നിർണായകമായ പങ്കിനെ അനുസ്‌മരിച്ചു. യുക്മ ചാരിറ്റിഫൗണ്ടേഷൻ ഒന്നര വർഷത്തിനിടെ രണ്ടു കോടിയോളം രൂപ യുകെ മലയാളികളുടെ സഹകരണത്തോടെ പ്രതിസന്ധി ഘട്ടങ്ങളിൽ വിഷമമനുഭവിച്ച യുകെ മലയാളികൾക്ക് വിതരണം ചെയ്തകാര്യം ഓർമിപ്പിച്ചു. യുക്മ നഴ്സസ് ഫോറം മെയ് മാസം അന്താരാഷ്ട്ര നഴ്‌സസ് ദിനാഘോഷത്തോടനുബന്ധിച്ച് സംഘടിപ്പിച്ച സമ്മേളനം വൻപിച്ച വിജയമായിരുന്നുവെന്നും നഴ്‌സുമാർക്ക് വേണ്ടി നടത്തിവന്നിരുന്ന നിരവധിയായ ഇടപെടലുകൾ തുടർന്നും തുടരുമെന്നും അദ്ദേഹം അറിയിച്ചു.      തുടർന്ന് നവംബർ 7-ാം തീയ്യതി ഗ്ലോസ്റ്ററിൽ നടക്കുന്ന യുക്മ നാഷണൽ കലാമേളയിൽ കേരളത്തിൻ്റെ സാംസ്കാരിക ടൂറിസം മന്ത്രി പി സി  വിഷ്ണുനാഥ് സംബന്ധിക്കുമെന്നറിയിച്ചു. റീജിയണൽ മത്സരങ്ങളിൽ പങ്കെടുത്ത് വിജയികളായി നാഷണൽ കലാമേളയിൽ പങ്കെടുക്കുവാനും കാണികളാകുവാനും ഏവരേയും യുക്മ പ്രസിഡൻ്റ് ക്ഷണിച്ചു.

എം എം സി എ കുടുംബാംഗങ്ങളുടെ പരിപാടികൾക്ക് ശേഷം പ്രശസ്ത സിനിമാ താരങ്ങൾ ബിനു അടിമാലി, തങ്കച്ചൻ വിതുര, പോൾസൺ കൂത്താട്ടുകുളം,  അറഫാത്ത്, ഗായകരായ ലിജിൻ, ഗ്രേഷ്യ  എന്നിവർ നയിച്ച സൂപ്പർ മെഗാ ഷോ കാണികളുടെ മനം കവർന്നു.  മെഗാഷോയിൽ നാട്ടിൽ നിന്നും എത്തിച്ചേർന്ന് അറാഫത്തിൻ്റെ നേതൃത്വത്തിലുള്ള കലാകാരൻമാർ അക്ഷരാർത്ഥത്തിൽ കാണികളെ ഇളക്കിമറിച്ചു. രാത്രി 9 മണിയോടെ ഓണാഘോഷ പരിപാടികൾ സമാപിച്ചു.

ആഘോഷങ്ങൾക്ക് എം എം സി എ ഭാരവാഹികളായ റോസ്ബിൻ സെബാസ്റ്റ്യൻ, ജയൻ ജോൺ, അലക്സ് വർഗീസ്, സുമേഷ് രാജൻ, ജിൻ്റിൽ രാജ് സെബാസ്‌റ്റ്യൻ, ജനീഷ് കുരുവിള, ജോസഫ് മാത്യു, ജോബിൻ ജോസഫ്, അലൻ തോമസ്, തുടങ്ങിയവർ പരിപാടികൾക്ക് നേതൃത്വം നൽകി.

എം എം സി എയുടെ ഓണാഘോഷ പരിപാടികളുടെ മെഗാ സ്പോൺസർ ലൈഫ് ലൈൻ പ്രൊട്ടക്ട് ലിമിറ്റഡ് ആണ്. കൂടാതെ ഡോ. സൈമൺസ് അക്കാദമി, ഏലൂർ കൺസൽട്ടൻസി യുകെ ലിമിറ്റഡ്, റോയൽ ഹെൽത്ത് കെയർ, അപ്‌റ്റസ് ലീഗൽ, കൈരളി ഇൻറർനാഷണൽ, ഐഡിയൽ കെയർ സെലൂഷൻസ്, ഫെയർമാർട്ട്, എഡ്സീസ് സ്‌കൂൾ ഓഫ് ഡ്രൈവിംഗ്, ജോവെൻ പ്രോമിസ്, ജെ എസ് ഡി ഡിസൈൻ കൺസൽട്ടൻസി ലിമിറ്റസ്,  എ & റ്റി സീഫ്രെഷ് ഫിഷ് മാർറ്റ്, മിത്ര ഗൈഡഡ് വിത്ത് കെയർ, കേരള മോട്ടോഴ്‌സ്, ബുക്ക് ബോക്സ് യുകെ എന്നിവരായിരുന്നു മറ്റ് സ്പോൺസർമാർ.

എം എം സി എ ഓണാഘോഷം വൻവിജയമാക്കി എല്ലാ കുടുംബാംഗങ്ങൾക്കും കമ്മിറ്റിക്കു വേണ്ടി പ്രസിഡൻ്റ് റോസ്ബിൻ സെബാസ്‌റ്റ്യൻ, സെക്രട്ടറി ജയൻ ജോൺ എന്നിവർ നന്ദി അറിയിച്ചു.

പരിപാടികളുടെ കൂടുതൽ ഫോട്ടോകൾ കാണുവാനായി താഴെ കൊടുത്തിരിക്കുന്ന ലിങ്കിൽ ക്ലിക്ക് ചെയ്യുക:

https://photos.app.goo.gl/dbtckYqv93AfeuLM6

https://photos.app.goo.gl/HPK5DLubiNdH4Sd68