യുക്മ –  ഇസ ലണ്ടൻ കേരളപൂരം വളളംകളി 2026 മൂന്ന്, നാല് ഹീറ്റ്സുകളിലെ ടീമുകളെ പരിചയപ്പെടാം….

കുര്യൻ ജോർജ്ജ്

(നാഷണൽ പി.ആർ.ഒ & മീഡിയ കോർഡിനേറ്റർ)

 ഹീറ്റ്സ്–3ൽ തായങ്കരി, പായിപ്പാട്, കരുവാറ്റ നേർക്കുനേർ

യുക്മ കേരളപൂരം വള്ളംകളി 2026-ലെ മൂന്നാം ഹീറ്റ്സ് ആവേശത്തിന്റെ മറ്റൊരു അധ്യായമാകാൻ ഒരുങ്ങുകയാണ്. മികച്ച പാരമ്പര്യവും പരിശീലന മികവും വിജയലക്ഷ്യവുമായി മൂന്ന് കരുത്തുറ്റ ടീമുകളാണ് ഹീറ്റ്സ്–3ൽ നേർക്കുനേർ എത്തുന്നത്. തായങ്കരി, പായിപ്പാട്, കരുവാറ്റ എന്നീ ചരിത്രപ്രസിദ്ധമായ ചുണ്ടൻവള്ളങ്ങളുടെ പേരിലാണ്   യുകെയിലെ പ്രമുഖ ബോട്ട് ക്ലബ്ബുകൾ ശക്തി തെളിയിക്കാൻ എത്തുന്നത്.

തായങ്കരി – ബി എം എ ബോട്ട് ക്ലബ്ബ്, ബാസറ്റ്ലോ (BMA Boat Club, Bassetlaw)

ചരിത്രപ്രസിദ്ധമായ തായങ്കരി വള്ളത്തിൽ ഇത്തവണയും മത്സരിക്കാനെത്തുന്നത്  – ബി എം എ ബോട്ട് ക്ലബ്ബ്, ബാസെറ്റ്ലോ

 ആണ്. ഇന്ത്യൻ നാവികസേനയിലെ മുൻ സൈനികനായ ജോബി കുഞ്ഞുവർക്കിയുടെ ക്യാപ്റ്റൻസിയിലാണ് ടീം മത്സരരംഗത്തിറങ്ങുന്നത്.

2023 മുതൽ തായങ്കരി വള്ളത്തിൽ മത്സരിക്കുന്ന ബി എം എ ബോട്ട് ക്ലബ്, കഴിഞ്ഞ തവണ ആറാം സ്ഥാനത്ത് ഒതുങ്ങേണ്ടി വന്നതിന്റെ നിരാശ മറികടന്ന് ഇത്തവണ മികച്ച പ്രകടനം ലക്ഷ്യമിട്ടാണ് തയ്യാറെടുപ്പുകൾ പൂർത്തിയാക്കിയത്. മുൻവർഷങ്ങളിലെ മത്സരപരിചയവും അച്ചടക്കത്തോടെയുള്ള പരിശീലനവുമാണ് ടീമിന്റെ പ്രധാന കരുത്ത്. മോൻസി കിച്ചൺ ആണ് ടീമിന്റെ സ്പോൺസർ.

പായിപ്പാട് – ഗോട്ട്സ് ബോട്ട് ക്ലബ്ബ്, മാഞ്ചസ്റ്റർ ജൂനിയേഴ്‌സ് (GOATS Boat Club, Manchester Juniors)

വള്ളംകളിയോടുള്ള അതിയായ ആവേശത്തിന് പേരുകേട്ട  ഗോട്ട്സ് ബോട്ട് ക്ലബ്ബ്, മാഞ്ചസ്റ്റർ ജൂനിയേഴ്‌സ് (GOATS Boat Club, Manchester Juniors) ഇത്തവണ രണ്ട് ടീമുകളുമായാണ് യുക്മ കേരളപൂരത്തിൽ പങ്കെടുക്കുന്നത്. ഹീറ്റ്സ്–3ൽ പായിപ്പാട് വള്ളത്തിലാണ്  ഗോട്ട്സ് ബോട്ട് ക്ലബ്ബ്,  ജൂനിയേഴ്സ്   മത്സരിക്കുന്നത്.

പോൾ അഷൻ പോൾ ക്യാപ്റ്റനായ ടീമിൽ യുവത്വത്തിന്റെ ചുറുചുറുക്കും മുൻകാല മത്സരപരിചയവും ചിട്ടയായ പരിശീലനത്തിലൂടെ നേടിയ ആത്മവിശ്വാസവും ഒത്തുചേരുന്നു. വിജയപ്രതീക്ഷയോടെയാണ് ടീം മത്സരത്തിനിറങ്ങുന്നത്. എൽ റ്റി സി ഗ്ലോബൽ കൺസൽറ്റൻസി (LTC Global Consultancy) ആണ് ടീമിന്റെ സ്പോൺസർ.

കരുവാറ്റ – ശ്രീ വിനായക ബോട്ട് ക്ലബ്, യുകെ

മൂന്നാം ഹീറ്റിൽ തായങ്കരിയെയും പായിപ്പാടിനെയും വെല്ലുവിളിച്ച് എത്തുന്നത് കരുവാറ്റ ചുണ്ടനാണ്. ശ്രീ വിനായക ബോട്ട് ക്ലബ് യുകെ  ആണ് ഇത്തവണയും കരുവാറ്റ വള്ളത്തിൽ മത്സരിക്കുന്നത്. ജഗദീഷ് നായർ ആണ് ടീം ക്യാപ്റ്റൻ. യുക്മ വള്ളംകളിയിലെ സ്ഥിരസാന്നിധ്യമായ ശ്രീ വിനായക ബോട്ട് ക്ലബ്, യുവത്വത്തിന് മുൻതൂക്കം നൽകി കൃത്യമായ പരിശീലനത്തിലൂടെയാണ് ഇത്തവണയും മത്സരത്തിനൊരുങ്ങുന്നത്. പോൾ ജോൺ & കോ സോളിസിറ്റേഴ്‌സ് (Paul John & Co Solicitors) ആണ് ടീമിന്റെ സ്പോൺസർ.

ആവേശപ്പോരിന് വേദിയൊരുങ്ങി മൂന്ന് വ്യത്യസ്ത കരുത്തുകളും ഒരേ ലക്ഷ്യവുമായി ഹീറ്റ്സ്–3ൽ ഏറ്റുമുട്ടുമ്പോൾ മത്സരം തീപാറുമെന്നതിൽ സംശയമില്ല. പരിചയസമ്പത്ത്, യുവത്വം, കഠിന പരിശീലനം എന്നിവയുടെ സമന്വയമാകുന്ന ഈ പോരാട്ടത്തിൽ ആരൊക്കെയാകും അടുത്ത റൗണ്ടിലേക്കുള്ള ടിക്കറ്റ് ഉറപ്പാക്കുക എന്നറിയാൻ ആകാംക്ഷയോടെ കാത്തിരിക്കുകയാണ് വള്ളംകളി പ്രേമികൾ. ആഗസ്റ്റ് 15-ന് മാൻവേഴ്സ് ലേക്കിൽ നടക്കുന്ന ഈ മത്സരം യുക്മ കേരളപൂരം വള്ളംകളി 2026-ലെ ഏറ്റവും ശ്രദ്ധേയമായ ഹീറ്റുകളിലൊന്നാകുമെന്ന പ്രതീക്ഷയിലാണ് ഏവരും.

ഹീറ്റ്സ്–4ൽ പുന്നമട, ആലപ്പാട്, മാമ്പുഴക്കരി എന്നീ ടീമുകൾ നേർക്കുനേർ

യുക്മ കേരളപൂരം വള്ളംകളി 2026-ലെ നാലാം ഹീറ്റ് പാരമ്പര്യവും പരിചയസമ്പത്തും യുവത്വത്തിന്റെ കരുത്തും പുതുമയുടെ ആവേശവും ഒരുമിക്കുന്ന മത്സരമായി മാറുകയാണ്. യുക്മ വള്ളംകളിയുടെ ചരിത്രത്തിൽ തങ്ങളുടെ വ്യക്തിമുദ്ര പതിപ്പിച്ച ടീമുകൾക്കൊപ്പം ആദ്യമായി മത്സരരംഗത്തിറങ്ങുന്ന ഒരു പുതുമുഖ ടീമും ഈ ഹീറ്റ്സിൽ അണിനിരക്കുന്നു.

പുന്നമട – ജവഹർ ബോട്ട് ക്ലബ്, ലിവർപൂൾ (Jawahar Boat Club, Liverpool)

യുക്മ വള്ളംകളിയുടെ ഏറ്റവും വിജയകരമായ ടീമുകളിലൊന്നായ ജവഹർ ബോട്ട് ക്ലബ്, ലിവർപൂൾ ഇത്തവണ പുന്നമട ചുണ്ടനിലാണ് മത്സരിക്കുന്നത്. പരിചയസമ്പന്നനായ ഹരികുമാർ ഗോപാലൻ നയിക്കുന്ന ലിവർപൂൾ ടീം വിജയചരിത്രം ആവർത്തിക്കാനുള്ള ലക്ഷ്യത്തോടെയാണ് ഒരിക്കൽക്കൂടി തുഴയാനിറങ്ങുന്നത്.

ആദ്യ മത്സരത്തിൽ തന്നെ റണ്ണറപ്പായും തുടർന്ന് തുടർച്ചയായി മൂന്ന് തവണ യുക്മ ട്രോഫി സ്വന്തമാക്കിയും ചരിത്രം കുറിച്ച ലിവർപൂൾ ടീം, കഴിഞ്ഞ തവണ മൂന്നാം സ്ഥാനത്താണ് ഫിനിഷ് ചെയ്തത്. ആ നിരാശ മറികടന്ന് വീണ്ടും ചാമ്പ്യൻപട്ടം വീണ്ടെടുക്കാനുള്ള ദൃഢനിശ്ചയത്തിലാണ് അവർ. ജെ ജെ കെയർ സർവീസ്, സൗത്ത്പോർട്ട് (JJ Care Service, Southport) ആണ് ടീമിന്റെ സ്പോൺസർ.

ആലപ്പാട് – കീത് ലി വാരിയേഴ്സ്  ബോട്ട് ക്ലബ്ബ് (Keighley Warriors Boat Club)

ബാബു സെബാസ്റ്റ്യൻ ക്യാപ്റ്റനായുള്ള  കീത് ലി വാരിയേഴ്‌സ് ബോട്ട് ക്ലബ് പ്രസിഡൻ്റ്  ഇത്തവണ ആലപ്പാട് ചുണ്ടനിലാണ് ശക്തിപരീക്ഷ നടത്തുന്നത്. കൃത്യമായ പരിശീലനവും മികച്ച മുന്നൊരുക്കങ്ങളുമായി യുക്മ ട്രോഫിക്കായി ശക്തമായ വെല്ലുവിളി ഉയർത്താനാണ് ടീമിന്റെ ലക്ഷ്യം.

ഈ സീസണിൽ കീത്ത്‌ലി വാരിയേഴ്‌സിന്റെ ഏറ്റവും വലിയ പ്രത്യേകത യുവതാരങ്ങളുടെ വരവാണ്. അനുഭവസമ്പന്നരായ തുഴച്ചിലുകാർക്കൊപ്പം യുവത്വത്തിന്റെ ഊർജവും ആവേശവും കൈകോർക്കുമ്പോൾ മികച്ച പ്രകടനം കാഴ്ചവയ്ക്കാനാകുമെന്ന ആത്മവിശ്വാസത്തിലാണ് ടീം. എൽ റ്റി സി ഗ്ലോബൽ കൺസൽട്ടൻസി (LTC Global Consultancy) ആണ് ടീമിന്റെ സ്പോൺസർ.

മാമ്പുഴക്കരി – ഹാവെർഹിൽ ബോട്ട് ക്ലബ്  (Haverhill Boat Club)

നാലാം ഹീറ്റിൽ പുതുമയുടെ പ്രതീകമായി എത്തുന്നത് ഹാവർഹിൽ ബോട്ട് ക്ലബ് ആണ്. യുക്മ വള്ളംകളിയിൽ കന്നിയങ്കം കുറിക്കുന്ന ഹാവെർഹിൽ ബോട്ട് ക്ലബ് ഇത്തവണ മാമ്പുഴക്കരി ചുണ്ടനിലാണ് മത്സരിക്കുന്നത്. ഗോവിന്ദ് ബാലഗോപാൽ ആണ് ടീമിന്റെ ക്യാപ്റ്റൻ.

യുകെയിലെ ഈസ്റ്റ് ആംഗ്ലിയ മേഖലയിലെ സഫോൾക്കിലുള്ള ഹാവെർഹിൽ മലയാളി അസോസിയേഷൻ (HMA) അംഗങ്ങൾ ചേർന്നാണ് ഈ ബോട്ട് ക്ലബ് രൂപീകരിച്ചിരിക്കുന്നത്. വള്ളംകളി ഒരു കായികമത്സരം മാത്രമല്ല, കേരളത്തിന്റെ പൈതൃകവും സംസ്കാരവും യുകെയിൽ അഭിമാനത്തോടെ ഉയർത്തിക്കാട്ടുന്ന ഒരു സാംസ്കാരിക ആഘോഷമാണെന്ന വിശ്വാസത്തോടെയാണ് അവർ ഈ വേദിയിലേക്ക് എത്തുന്നത്. ആദ്യ മത്സരമാണെങ്കിലും മികച്ച പ്രകടനം കാഴ്ചവെക്കുമെന്ന ആത്മവിശ്വാസത്തിലാണ് ടീം. പോൾ ജോൺ & കോ സോളിസിറ്റേഴ്സ് (Paul John & Co Solicitors) ആണ് ടീമിന്റെ സ്പോൺസർ.

ആവേശം നിറഞ്ഞ നാലാം ഹീറ്റ്  വിജയപാരമ്പര്യമുള്ള ലിവർപൂൾ, യുവത്വത്തിന്റെ കരുത്തുമായി എത്തുന്ന കീത്ത്‌ലി വാരിയേഴ്‌സ്, പുതുമയുടെ ആവേശവുമായി കന്നിയങ്കത്തിനിറങ്ങുന്ന ഹാവെർഹിൽ ബോട്ട് ക്ലബ്  ഈ മൂന്ന് ടീമുകളുടെ പോരാട്ടം ഹീറ്റ്സ്–4നെ വള്ളംകളി പ്രേമികൾ ഏറെ പ്രതീക്ഷയോടെ കാത്തിരിക്കുന്ന മത്സരങ്ങളിലൊന്നാക്കി മാറ്റിയിരിക്കുകയാണ്. പരിചയവും ആവേശവും ആത്മവിശ്വാസവും ഏറ്റുമുട്ടുന്ന ഈ പോരാട്ടത്തിൽ അടുത്ത റൗണ്ടിലേക്കുള്ള ടിക്കറ്റ് ആരൊക്കെയാകും സ്വന്തമാക്കുക എന്നറിയാൻ ഇനി ആഗസ്റ്റ് 15-നെ കാത്തിരിക്കാം.

ഷെഫീൽഡിനടുത്ത് റോഥർഹാം മാൻവേഴ്സ് തടാകത്തിൽ വെച്ച് നടക്കുന്ന വള്ളംകളിയും അനുബന്ധ കലാപരിപാടികളും വൻ വിജയമാക്കുവാൻ യുക്മ ദേശീയ സമിതി പ്രസിഡൻ്റ് അഡ്വ. എബി സെബാസ്റ്റ്യൻ, ജനറൽ സെക്രട്ടറി ജയകുമാർ നായർ, ട്രഷറർ ഷീജോ വർഗ്ഗീസ് എന്നിവരുടെ നേതൃത്വത്തിൽ യുക്മ ദേശീയ, റീജിയണൽ ഭാരവാഹികളുടെ നേതൃത്വത്തിൽ വിപുലമായ ഒരുക്കങ്ങളാണ് നടത്തി വരുന്നത്.

വള്ളംകളിയോട് അനുബന്ധിച്ച് നടക്കുന്ന കാർണിവൽ പതിവ് പോലെ കാണികളെ ആകർഷിക്കുന്ന വിധത്തിലുള്ള വിവിധ പരിപാടികൾ കൊണ്ട് ഇക്കുറിയും അത്യാകർഷമാകും. യുക്മ ഷീ ലീഡ്സ് നേതൃത്വം നൽകുന്ന യുക്മ – തെരേസാസ് ‘ഓണച്ചന്തം സീസൺ 2’ മലയാളി സുന്ദരി മത്സരം, നൂറ് കണക്കിന് മലയാളി വനിതകൾ അണി നിരക്കുന്ന ‘മെഗാ തിരുവാതിര’, കേരളത്തിൻ്റെ സാംസ്കാരികത്തനിമ വിളിച്ചോതുന്ന ഓട്ടൻതുള്ളൽ, ഓണക്കാലത്ത് പൂര നഗരിയെ ഹരം പിടിപ്പിക്കുന്ന പുലികളി, യുകെയുടെ വിവിധ ഭാഗങ്ങളിൽ നിന്നെത്തുന്ന കലാകാരൻമാരും കലാകാരികളും അവതരിപ്പിക്കുന്ന നൃത്ത സംഗീത പരിപാടികൾ ഉൾപ്പടെ നിരവധി കലാപരിപാടികളാണ് വള്ളംകളി വേദിയിൽ അരങ്ങേറുന്നത്.

യുക്മ – ഇസ ലണ്ടൻ കേരളപൂരം വള്ളംകളി 2026 ടൈറ്റിൽ സ്പോൺസറായ ഇസ ലണ്ടനോടൊപ്പം ലൈഫ് ലൈൻ പ്രൊട്ടക്ട് ലിമിറ്റഡ്, തെരേസാസ് ലണ്ടൻ, പോൾ ജോൺ & കമ്പനി സോളിസിറ്റേഴ്‌സ്, മണവാട്ടി, LTC ഗ്ലോബൽ, ഏലൂർ കൺസൽട്ടൻസി, കേരള ഡിലൈറ്റ്സ് എന്നിവരും ഉടൻ റിലീസിനൊരുങ്ങുന്ന മനോഹരമായ മലയാള ചിത്രം ‘ബത്‌ലഹേം കുടുംബ യൂണിറ്റ്’ ഉം ആയിരിക്കും മറ്റ് പ്രധാന സ്പോൺസർമാർ.

യുക്മ – ഇസ ലണ്ടൻ കേരളപൂരം വള്ളംകളി 2026 സ്പോൺസർ ചെയ്യുന്നതിനും കൂടുതൽ വിവരങ്ങൾക്കുമായി താഴെ പറയുന്നവരെ ബന്ധപ്പെടേണ്ടതാണ് :-

അഡ്വ. എബി സെബാസ്റ്റ്യൻ – 07702862186

ജയകുമാർ നായർ – 07403223006

ഡിക്സ് ജോർജജ് – 07403312250.

യുക്മ – ഇസ ലണ്ടൻ കേരളപൂരം വള്ളംകളി 2026 നടക്കുന്ന വേദിയുടെ വിലാസം:-

Manvers Lake 

Station Road 

Wath-Upon-Dearne

Rotherham 

South Yorkshire.

S63 7DG.