1 GBP = 120.05
breaking news

പതിനാറാമത് യുക്മ – ലൈഫ് ലൈൻ ദേശീയ കലാമേളയ്ക്ക് ഒരുക്കങ്ങൾ പൂർത്തിയാക്കി സംഘാടക സമിതി; ചെൽറ്റൻഹാമിലെ എം.ടി. വാസുദേവൻ നായർ നഗറിൽ മത്സരാർത്ഥികൾക്കായി ഒരുങ്ങുന്നത് ഏഴു വേദികൾ

പതിനാറാമത് യുക്മ – ലൈഫ് ലൈൻ ദേശീയ കലാമേളയ്ക്ക് ഒരുക്കങ്ങൾ പൂർത്തിയാക്കി സംഘാടക സമിതി; ചെൽറ്റൻഹാമിലെ എം.ടി. വാസുദേവൻ നായർ നഗറിൽ മത്സരാർത്ഥികൾക്കായി ഒരുങ്ങുന്നത് ഏഴു വേദികൾ

ചെൽട്ടൻഹാം: പതിനാറാമത് യുക്മ – ലൈഫ് ലൈൻ ദേശീയ കലാമേളയ്ക്ക് ഒരുക്കങ്ങൾ പൂർത്തിയാക്കി സംഘാടക സമിതി. ചെൽറ്റൻഹാമിലെ ക്ളീവ് സ്‌കൂളിൽ ഏഴു വേദികളാണ് ഇക്കുറി മത്സരാർത്ഥികൾക്കായി ഒരുങ്ങിയിരിക്കുന്നത്. റീജിയണൽ കലാമേളകളിൽ മത്സരാർത്ഥികളുടെ എണ്ണത്തിലുണ്ടായ വർദ്ധനവും മത്സര ഇനങ്ങളിലെ വർദ്ധനവും മുൻ നിർത്തിയാണ് ഇത്തവണ ഏഴ് വേദികളിലായി മത്സരങ്ങൾ നടത്തപ്പെടുന്നത്. ദേശീയ കലാമേള 2023 വരെ അഞ്ച് വേദികളിലും 2024 ൽ ആറ് വേദികളിലുമായിട്ടാണ് നടത്തിയത്. ഇതാദ്യമായിട്ടാണ് ദേശീയ കലാമേള ഏഴ് വേദികളിലായി സംഘടിപ്പിക്കുന്നത്.

നവംബർ 01 ശനിയാഴ്‌ച രാവിലെ 9 മണി മുതൽ ആരംഭിക്കുന്ന കലാമേളയുടെ സുഗമമായ നടത്തിപ്പിന് ആവശ്യമായ തയ്യാറെടുപ്പുകൾ കൃത്യമായി നടത്തി ഒരുക്കങ്ങൾ  പൂർത്തിയായതായി യുക്മ പ്രസിഡൻ്റ് അഡ്വ. എബി സെബാസ്റ്റ്യൻ, ജനറൽ സെക്രട്ടറി ജയകുമാർ നായർ, ട്രഷറർ ഷീജോ വർഗ്ഗീസ്, കലാമേള കൺവീനർ വർഗ്ഗീസ് ഡാനിയൽ എന്നിവർ അറിയിച്ചു. വിവിധ ദേശീയ റീജിയണൽ ഭാരവാഹികൾ അടങ്ങുന്ന സംഘാടക സമിതി ഇന്നലെ രാവിലെ മുതൽ തന്നെ അവസാനവട്ട ഒരുക്കങ്ങളുമായി ക്ളീവ് സ്‌കൂളിൽ സന്നിഹിതരായിരുന്നു. വേദികൾ തയ്യാറാക്കുന്നതിനും വിവിധ റീജിയനുകളിൽ നിന്നെത്തുന്ന മത്സരാർത്ഥികൾക്ക് ആവശ്യമായ സൗകര്യങ്ങൾ ഒരുക്കുന്നതിനും വിവിധ കമ്മിറ്റികൾ തന്നെ പ്രവർത്തിക്കുന്നുണ്ട്.

യുക്‌മ പ്രസിഡൻ്റ് അഡ്വ. എബി സെബാസ്റ്റ്യൻ്റെ അദ്ധ്യക്ഷതയിൽ രാവിലെ 11.30 ന് ചേരുന്ന യോഗത്തിൽ വച്ച് ബഹുമാനപ്പെട്ട ചെൽറ്റൻഹാം മേയർ ഡോ. ഡേവിഡ് വില്ലിംഗ്ഹാം പതിനാറാമത് ദേശീയ കലാമേള ഔദ്യോഗികമായി ഉദ്ഘാടനം ചെയ്യും. ജനറൽ സെക്രട്ടറി ജയകുമാർ നായർ യോഗത്തിന് സ്വാഗതം ആശംസിക്കും. പ്രശസ്‌ത ബ്രിട്ടീഷ് ഇന്ത്യൻ നടി വരദ സേതു യുക്‌മ ദേശീയ കലാമേളയിൽ സെലിബ്രിറ്റി ഗസ്‌റ്റായി പങ്കെടുക്കും. യുക്‌മ ദേശീയ ഭാരവാഹികൾ പങ്കെടുക്കുന്ന യോഗത്തിന് കലാമേള കൺവീനർ വർഗ്ഗീസ് ഡാനിയൽ കൃതഞ്ജത പ്രകാശിപ്പിക്കും.

യുക്മ ലൈഫ് ലൈൻ ദേശീയ കലാമേള സ്പോൺസർ ചെയ്യുന്നത് ലൈഫ് ലൈൻ പ്രൊട്ടക്ട്, ഫസ്റ്റ് കോൾ 247 ലിമിറ്റഡ്, പോൾ ജോൺ & കമ്പനി സോളിസിറ്റേഴ്‌സ്, തെരേസാസ് ലണ്ടൻ, ത്തൂറ്റ് ഗ്രൂപ്പ്, മട്ടാഞ്ചേരി കാറ്ററിംഗ് ടോണ്ടൻ, ജെ.എം.പി സോഫ്‌റ്റ് വെയർ, മാഗ്‌നവിഷൻ എന്നീ സ്ഥാപനങ്ങളാണ്. ദേശീയ, റീജണൽ കലാമേളകളുടെ രജിസ്‌ട്രേഷൻ മുതൽ റിസൽട്ട് വരെയുള്ള കാര്യങ്ങൾ സുഗമമായി നടത്തുന്നതിന് വേണ്ട സോഫ്‌റ്റ് വെയർ രൂപകൽപ്പന ചെയ്ത് സപ്പോർട്ട് ചെയ്യുന്നത് യുക്‌മ മുൻ സൌത്ത് ഈസ്റ്റ് റീജിയണൽ സെക്രട്ടറി കൂടിയായ ജോസ് പി.എംൻ്റെ JMP സോഫ്‌റ്റ് വെയർ എന്ന സ്ഥാപനമാണ്.

പതിനാറാമത് യുക്‌മ ദേശീയ കലാമേളയിലേക്ക് മുഴുവൻ മത്സരാർത്ഥികളെയും കാണികളെയും യുക്മ ദേശീയ സമിതിക്ക് വേണ്ടി സ്‌നേഹപൂർവ്വം സ്വാഗതം ചെയ്യുന്നതായി പ്രസിഡൻ്റ് അഡ്വ. എബി സെബാസ്റ്റ്യൻ, ജനറൽ സെക്രട്ടറി ജയകുമാർ നായർ, ഇവൻ്റ് കോർഡിനേറ്റർ ഡോ. ബിജു പെരിങ്ങത്തറ എന്നിവർ അറിയിച്ചു.

Latest News:

Post Your Comments Here ( Click here for malayalam )

Press Esc to close
show more