സയണിസം വിവാദം: 11 പ്രാദേശിക കൗൺസിലുകളിൽ ഗ്രീൻ പാർട്ടിയുമായുള്ള അധികാര പങ്കാളിത്തം അവസാനിപ്പിച്ച് ലേബർ പാർട്ടി

ലണ്ടൻ: സയണിസത്തെ വംശീയതയുടെ രൂപമായി വിശേഷിപ്പിക്കുന്ന ഗ്രീൻ പാർട്ടിയുടെ പുതിയ നയത്തിനെതിരെ കടുത്ത നിലപാടുമായി ലേബർ പാർട്ടി. ഇതിന്റെ ഭാഗമായി ഇംഗ്ലണ്ടിലെ 11 പ്രാദേശിക കൗൺസിലുകളിൽ ഗ്രീൻ പാർട്ടിയുമായുള്ള അധികാര പങ്കാളിത്തവും ഭരണസഖ്യവും അവസാനിപ്പിക്കാൻ ലേബർ പാർട്ടി തീരുമാനിച്ചു. ഷെഫീൽഡ്, വാർവിക്, ലൂയിസ് തുടങ്ങിയ പ്രദേശങ്ങളിലെ കൗൺസിലുകളിലും ഇതിന്റെ പ്രത്യാഘാതമുണ്ടാകും.

സയണിസം വംശീയതയാണെന്ന പ്രമേയം ഗ്രീൻ പാർട്ടിയുടെ ദേശീയ സമ്മേളനത്തിൽ അംഗങ്ങൾ അംഗീകരിച്ചതോടെയാണ് ഇരുപാർട്ടികളും തമ്മിലുള്ള ബന്ധം വഷളായത്. ചരിത്രപരമായ പലസ്തീനിൽ ജൂത ദേശീയ രാഷ്ട്രം സ്ഥാപിക്കുന്നതിനെ പിന്തുണയ്ക്കുന്ന പ്രത്യയശാസ്ത്രമാണ് സയണിസമെന്നും അത് വംശീയ ദേശീയതയിൽ അധിഷ്ഠിതമാണെന്നുമാണ് പ്രമേയത്തിലെ പ്രധാന വാദം. ഇന്നത്തെ ഇസ്രായേൽ ഉൾപ്പെടുന്ന പ്രദേശത്ത് ഏക ജനാധിപത്യ പലസ്തീൻ രാഷ്ട്രം സ്ഥാപിക്കണമെന്ന ആവശ്യവും പ്രമേയം മുന്നോട്ടുവയ്ക്കുന്നു.

ഗ്രീൻ പാർട്ടിയുടെ ദേശീയ നയമായി മാറിയ ഈ പ്രമേയം ജൂത സംഘടനകളിൽ നിന്നും പ്രതിപക്ഷ രാഷ്ട്രീയ പാർട്ടികളിൽ നിന്നും കടുത്ത വിമർശനത്തിന് ഇടയാക്കിയിരുന്നു. പ്രമേയം യഹൂദവിരുദ്ധതയെ പ്രോത്സാഹിപ്പിക്കുന്നതാണെന്നാണ് വിമർശകരുടെ ആരോപണം. അതേസമയം, ഗാസയിലെയും പലസ്തീൻ ജനതയോടുമുള്ള ഇസ്രായേലിന്റെ നടപടികൾ വംശീയ പ്രത്യയശാസ്ത്രത്തിൽ അധിഷ്ഠിതമാണെന്ന നിലപാടിലാണ് ഗ്രീൻ പാർട്ടി നേതാവ് സാക് പോളാൻസ്കി. പ്രമേയത്തിൽ ചില അപൂർണതകളുണ്ടെന്ന് സമ്മതിക്കുമ്പോഴും അതിന്റെ അടിസ്ഥാന ആശയത്തെ അദ്ദേഹം ന്യായീകരിച്ചു.

സയണിസത്തെ വംശീയതയായി വിശേഷിപ്പിക്കുന്ന നയം അംഗീകരിച്ച ഒരു പാർട്ടിയുമായി സർക്കാരിന്റെ ഒരു തലത്തിലും സഹകരിക്കാനാകില്ലെന്ന് ലേബർ പാർട്ടി അധ്യക്ഷ ബ്രിഡ്ജറ്റ് ഫിലിപ്സൺ വ്യക്തമാക്കി. ലേബർ പാർട്ടി തുടക്കം മുതൽ ഈ നിലപാടിലാണെന്നും അവർ പറഞ്ഞു.

Please Read: ഐ.എൽ.ആർ പോരാട്ടത്തിൽ യുക്മയുടെ ഇടപെടലിന് നിർണായക നേട്ടം

ഒക്ടോബറിൽ പ്രധാനമന്ത്രി ആൻഡി ബേൺഹാമും ഗ്രീൻ പാർട്ടിയുടെ ഈ നയത്തിനെതിരെ രംഗത്തെത്തിയിരുന്നു. പ്രാദേശിക കൗൺസിലുകളിലെ ഗ്രീൻ പാർട്ടി നേതാക്കൾ ദേശീയ സമ്മേളനത്തിൽ അംഗീകരിച്ച പ്രമേയത്തെ പരസ്യമായി തള്ളിപ്പറയണമെന്നും ദേശീയ നേതൃത്വത്തോട് നയം പുനഃപരിശോധിക്കാൻ ആവശ്യപ്പെടണമെന്നും ലേബർ പാർട്ടി നിർദേശിച്ചിരുന്നു.

ഇരുപാർട്ടികളും തമ്മിൽ പ്രാദേശിക ഭരണതലത്തിൽ 18 കൗൺസിലുകളിൽ സഹകരണ കരാറുകൾ നിലവിലുണ്ടായിരുന്നു. ഇതിൽ 11 കൗൺസിലുകൾ ലേബർ പാർട്ടി മുന്നോട്ടുവച്ച നിബന്ധനകൾ പാലിച്ചില്ലെന്നാണ് പാർട്ടിയുടെ വിശദീകരണം.

സഹകരണം അവസാനിപ്പിക്കുന്ന 11 കൗൺസിലുകൾ:

1. ആരൺ ഡിസ്ട്രിക്ട് കൗൺസിൽ
2. ഡെർബിഷെയർ ഡെയ്ൽസ് ഡിസ്ട്രിക്ട് കൗൺസിൽ
3. ഹാവന്റ് ബറോ കൗൺസിൽ
4. ലൂയിസ് ഡിസ്ട്രിക്ട് കൗൺസിൽ
5. റണ്ണിമീഡ് ബറോ കൗൺസിൽ
6. ഷെഫീൽഡ് സിറ്റി കൗൺസിൽ
7. സ്റ്റാഫോർഡ് ബറോ കൗൺസിൽ
8. വാർവിക് ഡിസ്ട്രിക്ട് കൗൺസിൽ
9. വീൽഡൻ ഡിസ്ട്രിക്ട് കൗൺസിൽ
10. വെസ്റ്റ് ഡെവൺ ബറോ കൗൺസിൽ
11. വെസ്റ്റ് സഫോൾക്ക് കൗൺസിൽ

അതേസമയം, ബ്രോഡ്‌ലാൻഡ്, മോൺമൗത്ത്ഷെയർ, നോർത്ത് സോമർസെറ്റ്, റോതർ, വെസ്റ്റ് ഓക്സ്ഫോർഡ്ഷെയർ, വെസ്റ്റ് സസെക്സ് എന്നീ ആറ് കൗൺസിലുകളിൽ ലേബർ പാർട്ടി മുന്നോട്ടുവച്ച നിബന്ധനകൾ പാലിക്കപ്പെട്ടതിനാൽ സഹകരണം തുടരും. കോവൻട്രി സിറ്റി കൗൺസിലിൽ നിലവിൽ ഔദ്യോഗിക ഭരണസഖ്യമില്ലെന്നും ഭാവിയിൽ അത്തരമൊരു കരാറുണ്ടാക്കില്ലെന്നും ലേബർ പാർട്ടി വ്യക്തമാക്കി. വെസ്റ്റ് ഓഫ് ഇംഗ്ലണ്ട് മേയർ ഭരണസംവിധാനത്തിൽ ഗ്രീൻ പാർട്ടി അംഗം ഡെപ്യൂട്ടി മേയറായി തുടരുന്ന സാഹചര്യത്തിൽ അവിടത്തെ സഹകരണം അവസാനിപ്പിക്കില്ലെന്നും പാർട്ടി അറിയിച്ചു.

ലേബർ പാർട്ടിയുടെ തീരുമാനത്തിനെതിരെ ഗ്രീൻ പാർട്ടി നേതാവ് സാക് പോളാൻസ്കി ശക്തമായി പ്രതികരിച്ചു. ഈ നടപടി ലേബർ പാർട്ടിക്ക് തിരിച്ചടിയാകുമെന്നും പ്രാദേശിക ജനങ്ങളുടെ സേവനങ്ങളെ തടസ്സപ്പെടുത്തുന്ന തീരുമാനമാണിതെന്നും അദ്ദേഹം ആരോപിച്ചു.

Please Read: കേരള സാംസ്കാരിക, സിനിമ, ടൂറിസം വകുപ്പ് മന്ത്രി പി. സി. വിഷ്ണുനാഥിന് ഹീത്രൂ വിമാനത്താവളത്തിൽ യുക്മയുടെ ഊഷ്മള സ്വീകരണം

പ്രാദേശിക തലത്തിൽ വിജയകരമായി പ്രവർത്തിച്ചുവരുന്ന പുരോഗമന ഭരണസഖ്യങ്ങളെ തകർക്കുന്ന ലേബർ പാർട്ടിയുടെ നടപടി നിരാശാജനകമാണെന്ന് ഗ്രീൻ പാർട്ടിയും ലോക്കൽ ഗവൺമെന്റ് അസോസിയേഷനിലെ ഗ്രീൻ ഗ്രൂപ്പും സംയുക്ത പ്രസ്താവനയിൽ പറഞ്ഞു.

ഭരണസഖ്യങ്ങൾ തകർന്നതോടെ ബന്ധപ്പെട്ട കൗൺസിലുകളിൽ പുതിയ പങ്കാളികളെ കണ്ടെത്തുകയോ ന്യൂനപക്ഷ ഭരണസംവിധാനമായി മുന്നോട്ടുപോകുകയോ ചെയ്യേണ്ടിവരും. ഇതുമൂലം ബജറ്റ് അംഗീകാരം, നയപരമായ തീരുമാനങ്ങൾ, പ്രാദേശിക വികസന പദ്ധതികൾ എന്നിവ വൈകാൻ സാധ്യതയുണ്ട്. ലക്ഷക്കണക്കിന് ജനങ്ങളെ ബാധിക്കുന്ന പ്രാദേശിക ഭരണപ്രവർത്തനങ്ങളിലും രാഷ്ട്രീയ തർക്കത്തിന്റെ പ്രത്യാഘാതം പ്രകടമാകുമെന്നാണ് വിലയിരുത്തൽ.

ഇസ്രായേൽ ഗാസയിൽ വംശഹത്യ നടത്തിയെന്ന ആരോപണം ഇസ്രായേൽ നിഷേധിച്ചിട്ടുണ്ട്. സയണിസത്തെക്കുറിച്ചുള്ള രാഷ്ട്രീയ നിലപാടുകളും പലസ്തീൻ വിഷയത്തിലെ അഭിപ്രായവ്യത്യാസങ്ങളും ഇപ്പോൾ ബ്രിട്ടനിലെ പ്രാദേശിക ഭരണരംഗത്തും വലിയ രാഷ്ട്രീയ പ്രതിസന്ധിക്ക് വഴിതുറന്നിരിക്കുകയാണ്.