പ്രധാനമന്ത്രിയുടെ കരീബിയൻ വിമാനയാത്ര വിവാദത്തിൽ; പ്രത്യേക വിമാനം ബേൺഹാമിനെ മാഞ്ചസ്റ്ററിൽ നിന്ന് കയറ്റാൻ വഴി തിരിച്ചു വിട്ടുവെന്ന് ആരോപണം

റിഷി സുനക്കിന്റെ സ്വകാര്യ വിമാന യാത്രകളെ വിമർശിച്ച ലേബർ പാർട്ടിക്ക് ഇപ്പോൾ ഇരട്ടത്താപ്പ് ആരോപണം; ‘എയർ മൈൽസ് ആൻഡി’ എന്ന് പരിഹസിച്ച് പ്രതിപക്ഷം

ലണ്ടൻ: കോമൺവെൽത്ത് ഉച്ചകോടിയിൽ പങ്കെടുക്കാൻ കരീബിയൻ രാജ്യമായ ആന്റിഗ്വ ആൻഡ് ബാർബുഡയിലേക്ക് പുറപ്പെട്ട പ്രധാനമന്ത്രി ആൻഡി ബേൺഹാമിനെ മാഞ്ചസ്റ്ററിൽ നിന്ന് കയറ്റാൻ സർക്കാർ വാടകയ്‌ക്കെടുത്ത പ്രത്യേക വിമാനം വഴിതിരിച്ചുവിട്ടത് വിവാദമാകുന്നു. ലണ്ടനിലെ സ്റ്റാൻസ്റ്റഡ് വിമാനത്താവളത്തിൽ നിന്ന് പുറപ്പെട്ട വിമാനം ഏകദേശം അരമണിക്കൂറിന് ശേഷം മാഞ്ചസ്റ്ററിലെത്തി പ്രധാനമന്ത്രിയെയും ഭാര്യയെയും കയറ്റുകയായിരുന്നു. യാത്രയുടെ ചെലവും പരിസ്ഥിതിക്ക് ഉണ്ടാകുന്ന ആഘാതവും ഇതോടെ വർധിച്ചുവെന്നാണ് വിമർശനം.

തിങ്കളാഴ്ച രാവിലെ ആറുമണിയോടെയാണ് പ്രധാനമന്ത്രിയുടെ ഔദ്യോഗിക യാത്രകൾക്കായി സർക്കാർ വാടകയ്‌ക്കെടുത്ത വിമാനം സ്റ്റാൻസ്റ്റഡിൽ നിന്ന് പുറപ്പെട്ടത്. കോമൺവെൽത്ത് രാജ്യങ്ങളുടെ ഭരണത്തലവന്മാരുടെ ഉച്ചകോടി ചൊവ്വാഴ്ച ആരംഭിക്കുന്ന ആന്റിഗ്വ ആൻഡ് ബാർബുഡയിലേക്കായിരുന്നു യാത്ര. ഉദ്യോഗസ്ഥരും മാധ്യമപ്രവർത്തകരുടെ സംഘത്തിലെ ഏതാനും പേരും വിമാനത്തിലുണ്ടായിരുന്നെങ്കിലും പ്രധാനമന്ത്രി യാത്ര ആരംഭിച്ചിരുന്നില്ല. മാഞ്ചസ്റ്ററിലെത്തിയ വിമാനം ഏകദേശം ഒരു മണിക്കൂറോളം അവിടെ ചെലവഴിച്ച ശേഷമാണ് കാനഡയിൽ ഇന്ധനം നിറയ്ക്കുന്നതിനായി യാത്ര തുടർന്നത്.

Please Read: കേരള സാംസ്കാരിക, സിനിമ, ടൂറിസം വകുപ്പ് മന്ത്രി പി. സി. വിഷ്ണുനാഥിന് ഹീത്രൂ വിമാനത്താവളത്തിൽ യുക്മയുടെ ഊഷ്മള സ്വീകരണം

മാഞ്ചസ്റ്ററിൽ നിന്ന് പ്രധാനമന്ത്രിയെ കയറ്റാൻ പ്രത്യേകമായി വിമാനം വഴിതിരിച്ചുവിട്ടത് എന്തിനാണെന്നും ഇതുമൂലം അധികമായി എത്ര ചെലവുണ്ടായെന്നും ചോദിച്ചപ്പോൾ, സുരക്ഷാ-പ്രവർത്തനപരമായ ആവശ്യങ്ങൾ പരിഗണിച്ചാണ് യാത്രാ തീരുമാനങ്ങളെടുക്കുന്നതെന്നായിരുന്നു ഡൗണിങ് സ്ട്രീറ്റിന്റെ വിശദീകരണം. ഇത്തരം കാര്യങ്ങളിൽ അഭിപ്രായം പറയാനാകില്ലെന്നും യാത്രാച്ചെലവുകൾ പതിവുപോലെ സുതാര്യമായി പ്രസിദ്ധീകരിക്കുമെന്നും പ്രധാനമന്ത്രിയുടെ ഔദ്യോഗിക വക്താവ് അറിയിച്ചു.

വെള്ളിയാഴ്ച സ്കോട്ട്ലൻഡിലായിരുന്ന ബേൺഹാം പിന്നീട് മാഞ്ചസ്റ്ററിലെത്തി അന്ന് വൈകുന്നേരം അവിടെ പ്രവർത്തിക്കുന്ന പ്രധാനമന്ത്രിയുടെ ഔദ്യോഗിക ഓഫീസായ നോ.10 നോർത്തിൽ ജോലി ചെയ്തിരുന്നു. ഗ്രേറ്റർ മാഞ്ചസ്റ്ററിലാണ് അദ്ദേഹത്തിന്റെ കുടുംബവീട്. വെള്ളിയാഴ്ചകളിൽ മാഞ്ചസ്റ്ററിൽ ജോലി ചെയ്യുന്നതും വാരാന്ത്യങ്ങൾ അവിടെ ചെലവഴിക്കുന്നതും പതിവാണെന്നും വക്താവ് വ്യക്തമാക്കി.

യാത്ര നികുതിപ്പണത്തിന്റെ മികച്ച വിനിയോഗമാണോ എന്ന ചോദ്യത്തിന് നേരിട്ട് മറുപടി നൽകാതെ നേരത്തേ വ്യക്തമാക്കിയ നിലപാടിലേക്ക് വക്താവ് മടങ്ങി. ലണ്ടനിലേക്ക് തിരിച്ചെത്താനുള്ള ബുദ്ധിമുട്ട് ഒഴിവാക്കാനാണോ പ്രധാനമന്ത്രി ഇത്തരമൊരു യാത്രാ ക്രമീകരണം നടത്തിയതെന്ന ചോദ്യവും അദ്ദേഹം നിഷേധിച്ചു.

പ്രധാനമന്ത്രിമാരുടെ ഔദ്യോഗിക വിമാനയാത്രകൾ സാധാരണയായി സ്റ്റാൻസ്റ്റഡ് വിമാനത്താവളത്തിൽ നിന്നാണ് ആരംഭിക്കുന്നത്. സ്വകാര്യ വിമാനങ്ങൾക്കായി പ്രത്യേക സുരക്ഷാ സംവിധാനങ്ങളുള്ള മേഖലയാണ് ഇവിടെ ഒരുക്കിയിരിക്കുന്നത്.

മുൻ പ്രധാനമന്ത്രി റിഷി സുനക്കിന്റെ ആഭ്യന്തര യാത്രകളിലെ ഹെലികോപ്റ്റർ, സ്വകാര്യ വിമാന ഉപയോഗത്തെ ലേബർ പാർട്ടി നിരന്തരം വിമർശിച്ചിരുന്നു. ട്രെയിനിൽ യാത്ര ചെയ്യാൻ ഏതാണ്ട് സമാനമായ സമയം മതിയാകുമായിരുന്ന സതാംപ്ടൺ, ഡോവർ, വെസ്റ്റ് മിഡ്‌ലാൻഡ്‌സ്, എസെക്സ് തുടങ്ങിയ സ്ഥലങ്ങളിലേക്കും സുനക് ഹെലികോപ്റ്റർ ഉപയോഗിച്ചതിനെതിരെ വിമർശനമുയർന്നിരുന്നു.

അധികാരത്തിലെത്തിയതിനു പിന്നാലെ സുനക് ഉപയോഗിച്ചിരുന്ന 40 ദശലക്ഷം പൗണ്ടിന്റെ ഹെലികോപ്റ്റർ കരാർ ലേബർ സർക്കാർ റദ്ദാക്കിയിരുന്നു. കൺസർവേറ്റീവ് ഭരണത്തിന്റെ 14 വർഷത്തെ വീഴ്ചകൾ തിരുത്തുന്നതിന്റെ ഭാഗമായാണ് നടപടിയെന്നായിരുന്നു അന്നത്തെ വിശദീകരണം.

Please Read: ബ്രിട്ടൻസ് ഗോട്ട് ടാലന്റിലൂടെ ലോകശ്രദ്ധ നേടിയ സൗപർണിക നായർ പതിനേഴാമത് യുക്മ ദേശീയ കലാമേളയിൽ സെലിബ്രിറ്റി അതിഥി

പതിവ് വിമാന സർവീസുകൾ ലഭ്യമായിരിക്കെ സ്കോട്ട്ലൻഡിലേക്ക് പോകാൻ സുനക് റോയൽ എയർഫോഴ്സ് വിമാനം ഉപയോഗിച്ചതിനെയും ലേബർ ചോദ്യം ചെയ്തിരുന്നു. ബദൽ യാത്രാസൗകര്യമില്ലാത്ത സാഹചര്യങ്ങളിൽ മാത്രമേ സ്വകാര്യ വിമാനങ്ങൾ ഉപയോഗിക്കാവൂ എന്ന മന്ത്രിസഭാ പെരുമാറ്റച്ചട്ടവും അന്ന് ചർച്ചയായിരുന്നു.

എന്നാൽ ഇപ്പോൾ ബേൺഹാമിന്റെ യാത്രാ ക്രമീകരണം പുറത്തുവന്നതോടെ ലേബർ പാർട്ടിയുടെ മുൻ നിലപാടിനെതിരെ പ്രതിപക്ഷം രംഗത്തെത്തി. സ്വകാര്യ ജെറ്റ് ഉപയോഗത്തിനെതിരെ നടപടിയെടുക്കുമെന്ന് വാഗ്ദാനം ചെയ്ത ലേബർ പാർട്ടി പ്രധാനമന്ത്രിയുടെ കാര്യത്തിൽ മറ്റൊരു നിലപാടാണ് സ്വീകരിക്കുന്നതെന്ന് ഷാഡോ കാബിനറ്റ് ഓഫീസ് മന്ത്രി മൈക്ക് വുഡ് ആരോപിച്ചു.

‘എയർ മൈൽസ് ആൻഡി’ എന്ന പരിഹാസപ്പേരും ഉയർത്തിയ അദ്ദേഹം, സ്വകാര്യ വിമാന ഉപയോഗത്തിൽ ലേബർ പാർട്ടിക്ക് ഒരാൾക്ക് ഒരു നിയമവും മറ്റൊരാൾക്ക് മറ്റൊരു നിയമവുമാണോ എന്ന ചോദ്യവും ഉന്നയിച്ചു.

പ്രത്യേക വിമാനത്തിന്റെ യാത്രയ്ക്ക് അധികമായി വന്ന ചെലവ് എത്രയാണെന്നോ മാഞ്ചസ്റ്ററിലെ ഇടത്താവളത്തിനുള്ള കൃത്യമായ സാമ്പത്തിക-പരിസ്ഥിതി ആഘാതം എത്രയാണെന്നോ സർക്കാർ ഇതുവരെ വെളിപ്പെടുത്തിയിട്ടില്ല. പതിവ് യാത്രാച്ചെലവുകളുടെ പ്രസിദ്ധീകരണത്തോടൊപ്പം ഇതുസംബന്ധിച്ച വിവരങ്ങളും പുറത്തുവരുമെന്നാണ് പ്രതീക്ഷ.