ഓക്സ്ഫോർഡ്ഷയറിൽ അഭയാർഥി തടങ്കൽ കേന്ദ്രം വിപുലീകരിക്കാൻ നീക്കം; മലിനജല പമ്പിങ് സ്റ്റേഷന് സമീപമുള്ള നിർമാണത്തിനെതിരെ പ്രതിഷേധം
Nov 16, 2026
ദുർഗന്ധവും പ്രാണിശല്യവും മലിനജലമൊഴുക്കുമെന്ന ആശങ്കയും; പദ്ധതിക്കെതിരെ വാട്ടർ കമ്പനിയും കൗണ്ടി കൗൺസിലും
യുകെയിൽ അഭയാർഥി തടങ്കൽ കേന്ദ്രങ്ങളുടെ ശേഷി വർധിപ്പിക്കാനുള്ള സർക്കാർ നീക്കത്തിനെതിരെ പ്രതിഷേധം ശക്തമാകുന്നു. ഓക്സ്ഫോർഡ്ഷയറിലെ കിഡ്ലിങ്ടണിന് സമീപമുള്ള ക്യാംസ്ഫീൽഡ് ഹൗസ് ഇമിഗ്രേഷൻ റിമൂവൽ സെന്റർ വിപുലീകരിക്കാനുള്ള പദ്ധതിക്കെതിരെയാണ് പുതിയ ആശങ്കകൾ ഉയർന്നിരിക്കുന്നത്. നിർദിഷ്ട തടങ്കൽ സൗകര്യങ്ങൾ മലിനജല പമ്പിങ് സ്റ്റേഷന് വെറും 20 മീറ്റർ മാത്രം അകലെയായിരിക്കുമെന്നതാണ് പ്രധാന വിമർശനം.
പദ്ധതിയുടെ ഭാഗമായി കേന്ദ്രത്തിലെ താമസസൗകര്യം നിലവിലെ 160 കിടക്കകളിൽനിന്ന് 400 ആയി ഉയർത്താനാണ് ആഭ്യന്തര മന്ത്രാലയത്തിന്റെ (ഹോം ഓഫീസ്) നീക്കം. നിലവിലുള്ള കെട്ടിടങ്ങൾ പുനഃക്രമീകരിച്ചും പുതിയ സുരക്ഷിത താമസ ബ്ലോക്കുകൾ ഒരുക്കിയുമാണ് വികസനം നടപ്പാക്കാൻ ഉദ്ദേശിക്കുന്നത്.
എന്നാൽ, പദ്ധതിയുമായി ബന്ധപ്പെട്ട് സമർപ്പിച്ച റിപ്പോർട്ടിൽ മലിനജല കമ്പനിയായ തേംസ് വാട്ടർ ഗുരുതരമായ ആശങ്കകൾ ഉന്നയിച്ചിട്ടുണ്ട്. മലിനജല പമ്പിങ് സ്റ്റേഷനിൽനിന്നുള്ള ദുർഗന്ധം, ശബ്ദം, കമ്പനങ്ങൾ, അറ്റകുറ്റപ്പണികൾക്കിടയിലെ വെളിച്ചം, പ്രാണികൾ, ഈച്ചകൾ എന്നിവ തടങ്കൽ കേന്ദ്രത്തിൽ കഴിയുന്നവരുടെ ജീവിതത്തെ പ്രതികൂലമായി ബാധിക്കാമെന്ന് കമ്പനി മുന്നറിയിപ്പ് നൽകി.
പ്രദേശത്തെ മലിനജല സംവിധാനത്തിന്റെയും മഴവെള്ള നിർമാർജന സംവിധാനത്തിന്റെയും കുടിവെള്ള വിതരണ ശൃംഖലയുടെയും ശേഷി സംബന്ധിച്ചും കമ്പനി ആശങ്ക പ്രകടിപ്പിച്ചിട്ടുണ്ട്. നിർമാണം നിലവിലുള്ള സംവിധാനങ്ങൾക്ക് അമിതഭാരം സൃഷ്ടിക്കുകയും മലിനജലം പുറത്തേക്ക് ഒഴുകി പ്രദേശത്ത് വെള്ളക്കെട്ടിനും മലിനീകരണത്തിനും കാരണമാകുകയും ചെയ്യാമെന്നാണ് മറ്റൊരു മുന്നറിയിപ്പ്. ഇതുസംബന്ധിച്ച് വിശദമായ പഠനം നടത്തണമെന്നും തേംസ് വാട്ടർ ആവശ്യപ്പെട്ടിട്ടുണ്ട്.
സർക്കാർ പദ്ധതിക്കെതിരെ മനുഷ്യാവകാശ സംഘടനകളും രംഗത്തെത്തിയിട്ടുണ്ട്. അടിസ്ഥാന ശുചിത്വവും മനുഷ്യാന്തസ്സും പോലും പരിഗണിക്കാതെയാണ് പദ്ധതി മുന്നോട്ടുപോകുന്നതെന്ന് റൈറ്റ് ടു റിമെയ്ൻ ചാരിറ്റിയുടെ ലീഡ് ലീഗൽ എജ്യുക്കേഷൻ ഓഫീസർ അല്ലി സ്വാഡ്ലിങ് വിമർശിച്ചു.
ഓക്സ്ഫോർഡ്ഷയർ കൗണ്ടി കൗൺസിലും കേന്ദ്രത്തിന്റെ വിപുലീകരണത്തിനെതിരെ ഔദ്യോഗികമായി എതിർപ്പ് അറിയിച്ചിട്ടുണ്ട്. പൊതുജനങ്ങളുടെ നിലവിലുള്ള ആശങ്കകൾ കൂടുതൽ രൂക്ഷമാക്കുന്ന പദ്ധതിയാണിതെന്നും ക്യാംസ്ഫീൽഡ് ഹൗസ് സ്ഥിരമായി അടച്ചുപൂട്ടണമെന്നും കൗൺസിൽ ആവശ്യപ്പെട്ടു.
2018-ൽ ആത്മഹത്യകൾ, കലാപങ്ങൾ, തടവുകാരുടെ രക്ഷപ്പെടൽ, മോശം സാഹചര്യങ്ങളെക്കുറിച്ചുള്ള പരാതികൾ എന്നിവയെ തുടർന്ന് അടച്ചുപൂട്ടിയ കേന്ദ്രം 2025 ഡിസംബറിലാണ് വീണ്ടും തുറന്നത്.
തടങ്കൽ അനുഭവം മനുഷ്യരെ മാനസികമായും സാമൂഹികമായും തകർക്കുന്ന ഒന്നാണെന്നും അവസാന മാർഗമായി മാത്രമേ ഇത് ഉപയോഗിക്കാവൂവെന്നും റെഫ്യൂജി കൗൺസിൽ ഡയറക്ടർ ഓഫ് എക്സ്റ്റേണൽ അഫയേഴ്സ് ഇമ്രാൻ ഹുസൈൻ പറഞ്ഞു. തടങ്കൽ കേന്ദ്രങ്ങൾ വികസിപ്പിക്കുന്നതിന് പകരം സമൂഹത്തിൽ കഴിയുന്നതിനുള്ള ബദൽ സംവിധാനങ്ങൾ സർക്കാർ പരിഗണിക്കണമെന്നും അദ്ദേഹം ആവശ്യപ്പെട്ടു.
2024-ലെ പൊതുതെരഞ്ഞെടുപ്പിന് ശേഷം 2026 ജൂൺ അവസാനം വരെയുള്ള കാലയളവിൽ നിയമപരമായ താമസാവകാശമില്ലാത്ത 80,000-ത്തോളം പേരെ ബ്രിട്ടനിൽനിന്ന് തിരിച്ചയക്കുകയോ നാടുകടത്തുകയോ ചെയ്തതായാണ് ആഭ്യന്തര മന്ത്രാലയത്തിന്റെ കണക്ക്. മുൻ രണ്ടുവർഷത്തെ അപേക്ഷിച്ച് 52 ശതമാനം വർധനവാണിത്.
രാജ്യത്തെ ഇമിഗ്രേഷൻ തടങ്കൽ സൗകര്യങ്ങളുടെ ശേഷി 40 ശതമാനം വർധിപ്പിക്കാനാണ് സർക്കാർ ലക്ഷ്യമിടുന്നത്. ക്യാംസ്ഫീൽഡ് ഹൗസ് വികസനപദ്ധതിയുമായി ബന്ധപ്പെട്ട പൊതുജനങ്ങളുടെയും വിവിധ സ്ഥാപനങ്ങളുടെയും എതിർപ്പുകൾ ഡിസംബർ 14-ന് ആരംഭിക്കുന്ന പബ്ലിക് ഇൻക്വയറിയിൽ പരിഗണിക്കും.
പദ്ധതിയിൽ സർക്കാരിന് പൂർണ വിശ്വാസമുണ്ടെന്നും, ബ്രിട്ടനിൽ തുടരാൻ നിയമപരമായ അവകാശമില്ലാത്തവരെ തിരിച്ചയക്കുന്നതിനുള്ള നടപടികൾ ശക്തിപ്പെടുത്തുന്നതിൽ തടങ്കൽ സൗകര്യങ്ങൾ വിപുലീകരിക്കുന്നത് നിർണായകമാണെന്നും ആഭ്യന്തര മന്ത്രാലയ വക്താവ് വ്യക്തമാക്കി.
യുക്മയുടെ മുൻ ദേശീയ പ്രസിഡന്റുമാർ ഉൾപ്പെടെ ആറു പ്രമുഖർക്ക് വിശിഷ്ട സേവന പുരസ്കാരങ്ങൾ; മന്ത്രി പി. സി. വിഷ്ണുനാഥ് ആദരിച്ചു……. ഡോ. ബിജു പെരിങ്ങത്തറ, മനോജ് പിള്ള, അലക്സ് വർഗീസ്, കുര്യൻ ജോർജ്ജ്, സ്മിത ബാബു തോട്ടം, റെയ്മോൾ നിധീരി എന്നിവർക്ക് ആദരം; യുക്മ ദേശീയ കലാമേളയുടെ ഉദ്ഘാടനവേദിയിൽ നേതൃത്വമികവിനും ദീർഘകാല സംഘടനാ സേവനത്തിനും അംഗീകാരം /
യുക്മ ഫോർച്യൂൺ ലോട്ടറി 2026 ഒന്നാം സമ്മാനം പതിനായിരം പൌണ്ട് ഈസ്റ്റ്ബോണിലെ മാജിദ് തച്ചപറമ്പന്, രണ്ടാം സമ്മാനം 1 പവൻ സ്വർണ്ണം വാറിംഗ്ടണിലെ ആൻ്റ്ലിൻ ആൻ്റോയ്ക്ക്. അര പവൻ സ്വർണ്ണത്തിൻ്റെ 2 മൂന്നാം സമ്മാനങ്ങൾ ഡോർചെസ്റ്ററിലെ പ്രിജിമോൾ വാസു, ഹേവാർഡ്സ് ഹീത്തിലെ ചിഞ്ചു കുര്യാക്കോസ് എന്നിവർക്ക്. /
പതിനേഴാമത് യുക്മ ദേശീയ കലാമേളയിൽ മിഡ്ലാൻഡ്സ് റീജിയൻ ഓവറോൾ ചാമ്പ്യന്മാർ; വാർവിക് ആൻഡ് ലീമിങ്ടൺ മലയാളി അസോസിയേഷൻ അസോസിയേഷൻ ചാമ്പ്യന്മാർ….. യോർക്ക്ഷെയർ ആൻഡ് ഹംബർ രണ്ടാം സ്ഥാനത്ത്; നോർത്ത് വെസ്റ്റ് മൂന്നാമത്; കലാതിലകമായി അമേയ കൃഷ്ണ നിധീഷ്, നാട്യമയൂരമായി ഐശ്വര്യ വിനു നായർ; ഏഴ് വേദികളിലായി 46 മത്സരയിനങ്ങൾ — സമയനിഷ്ഠയിലും സംഘാടനമികവിലും ശ്രദ്ധേയമായി യുക്മ ദേശീയ കലാമേള 2026 /
യുകെയിൽ യുക്മയുമായി സഹകരിച്ച് ‘മിനി ഐ.എഫ്.എഫ്.കെ’ സംഘടിപ്പിക്കുമെന്ന് മന്ത്രി പി. സി. വിഷ്ണുനാഥ്; കേരള രാജ്യാന്തര ചലച്ചിത്രമേളയ്ക്ക് ബ്രിട്ടനിലും വേദിയൊരുങ്ങുന്നു……ഡിസംബറിൽ തിരുവനന്തപുരത്ത് നടക്കുന്ന ഐ.എഫ്.എഫ്.കെ.യ്ക്ക് ശേഷം യുകെയിൽ മിനി ചലച്ചിത്രമേള; അടുത്ത ഓണക്കാലത്ത് കേരള സർക്കാരിന്റെ ഏകോപനത്തിൽ യുകെയിൽ ഓണാഘോഷം; ലോകമെമ്പാടുമുള്ള പ്രവാസി മലയാളികളെ കേരള ടൂറിസത്തിന്റെ അംബാസഡർമാരാക്കാൻ പദ്ധതികൾ; യുക്മ ദേശീയ കലാമേള ലോക മലയാളി സമൂഹത്തിന് മാതൃകയെന്നും മന്ത്രി /
ഐ.എൽ.ആർ പോരാട്ടത്തിൽ യുക്മയുടെ ഇടപെടലിന് നിർണായക നേട്ടം; കെയർ വർക്കർമാർക്ക് അഞ്ച് വർഷത്തെ കാലാവധി തുടരും; ഒന്നര ലക്ഷത്തോളം കെയർ ജീവനക്കാർക്കും അവരുടെ കുടുംബങ്ങൾക്കും ആശ്വാസം; യുക്മയുടെ ദേശീയതല ക്യാംപെയ്ൻ ഫലം കണ്ടുതുടങ്ങുന്നു /
click on malayalam character to switch languages