ബ്രസീലിൽ കണ്ടെത്തിയ കൊറോണ വൈറസിന്റെ വേരിയന്റ് ബ്രിട്ടനിലും

Mar 01, 2021

ലണ്ടൻ: ബ്രസീലിൽ ആദ്യമായി കണ്ടെത്തിയ ഒരു കൊറോണ വൈറസിന്റെ പുതിയ വേരിയന്റ യുകെയിലും കണ്ടെത്തി. ഇംഗ്ലണ്ടിൽ മൂന്ന് കേസുകളും സ്കോട്ട്ലൻഡിൽ മൂന്ന് കേസുകളും വീതമാണ് കണ്ടെത്തിയിരിക്കുന്നത്. ഇംഗ്ലണ്ടിൽ, പുതിയ വേരിയന്റിന് പോസിറ്റീവ് ആയതിൽ ഒരാളെ കണ്ടെത്താൻ ഉദ്യോഗസ്ഥർ ഇപ്പോഴും ശ്രമിച്ചു കൊണ്ടിരിക്കുകയാണ്. ഇത് അധികൃതരിലും ആശങ്ക പരത്തിയിട്ടുണ്ട്.

മൂന്ന് സ്കോട്ടിഷ് നിവാസികൾ ബ്രസീലിൽ നിന്ന് പാരീസ്, ലണ്ടൻ വഴി വടക്കുകിഴക്കൻ സ്കോട്ട്ലൻഡിലേക്ക് പറന്നതായി സ്കോട്ടിഷ് സർക്കാർ അറിയിച്ചു. ഇവരിലാണ് പുതിയ വേരിയന്റ് കണ്ടെത്തിയിരിക്കുന്നത്. ജനുവരിയിൽ വടക്കൻ ബ്രസീലിലെ മനാസിൽ നിന്ന് ജപ്പാനിലേക്ക് പോയ യാത്രക്കാരിൽ ആദ്യമായി കണ്ടെത്തിയ ഈ വേരിയന്റ് (പി 1) കൂടുതൽ അപകടകാരിയാകുമെന്ന് വിദഗ്ദ്ധർ കരുതുന്നു.

പുതിയ വേരിയന്റിനെ നേരിടാൻ പ്രതിരോധ കുത്തിവയ്പ്പുകൾ ഫലപ്രദമാകില്ലെന്ന ആശങ്കയുമുണ്ട്. അതേസമയം വാക്സിനുകൾ അതിവേഗം പൊരുത്തപ്പെടുത്താമെന്ന് എൻ‌എച്ച്‌എസ് ഇംഗ്ലണ്ടിലെ പ്രൊഫ. സ്റ്റീഫൻ പോവിസ് പറഞ്ഞു. വേരിയന്റുകളും മ്യൂട്ടേഷനുകളും തിരിച്ചറിയുന്നതിൽ യുകെ മറ്റ് പല രാജ്യങ്ങളെക്കാളും മുന്നേറുന്നു, അതിനാൽ തന്നെവേഗത്തിൽ മുൻകരുതലെടുത്ത് പ്രവർത്തിക്കാൻ കഴിയുമെന്ന് പബ്ലിക് ഹെൽത്ത് ഇംഗ്ലണ്ടിലെ (പിഎച്ച്ഇ) ഡോ. സൂസൻ ഹോപ്കിൻസ് പറഞ്ഞു,

ഇംഗ്ലണ്ടിൽ, ആദ്യത്തെ രണ്ട് കേസുകൾ സൗത്ത് ഗ്ലൗസെസ്റ്റർഷയറിലെ ഒരേ വീട്ടിൽ നിന്നുള്ളവരാണ്.സർക്കാരിന്റെ ഹോട്ടൽ ക്വാറന്റൈൻ നിയമം പ്രാബല്യത്തിൽ വരുന്നതിന് അഞ്ചു ദിവസം മുൻപ് ഫെബ്രുവരി 10 ന് ബ്രസീലിൽ നിന്ന് മടങ്ങിയെത്തിയ രണ്ടു പേർക്കാണ് പുതിയ വേരിയന്റ് സ്ഥിരീകരിച്ചത്.
അതേസമയം ഇതേ വീട്ടിലെ മറ്റ് രണ്ട് ആളുകൾക്കും കോവിഡിന് പോസിറ്റീവ് ആണെന്ന് സ്ഥിരീകരിച്ചിട്ടുണ്ട്, എന്നാൽ ഇത് ഒരേ വേരിയന്റാണോയെന്ന് കണ്ടെത്തുന്നതിനുള്ള പരിശോധനകൾ ഇപ്പോഴും നടക്കുന്നു, അതിനാൽ യുകെയിലെ ആകെ ആറിൽ അവരെ ഉൾപ്പെടുത്തിയിട്ടില്ല.
സാവോ പോളോയിൽ നിന്ന് സൂറിച്ച് വഴി ഹീത്രോയിലേക്ക് ഒരേ വിമാനത്തിലുണ്ടായിരുന്ന യാത്രക്കാരെ അധികൃതർ ഇപ്പോൾ കണ്ടെത്തുന്നുണ്ടെന്ന് പിഎച്ച്ഇ പറഞ്ഞു.
ഇംഗ്ലണ്ടിൽ തിരിച്ചറിഞ്ഞ മൂന്നാമത്തെ കേസ് മറ്റ് രണ്ട് കേസുകളുമായി ബന്ധപ്പെട്ടിട്ടില്ല, ആ വ്യക്തി എവിടെയാണെന്ന് ഇപ്പോഴും അറിവായിട്ടില്ല.
വ്യക്തി അവരുടെ ടെസ്റ്റ് രജിസ്ട്രേഷൻ കാർഡ് പൂർത്തിയാക്കിയിട്ടില്ലെന്നും അതിനാൽ ഫോളോ-അപ്പ് വിശദാംശങ്ങൾ ലഭ്യമല്ലെന്നും പിഎച്ച്ഇ പറഞ്ഞു.

ഫെബ്രുവരി 12 അല്ലെങ്കിൽ 13 തീയതികളിൽ പരിശോധന നടത്തിയവരോ ഫലം ലഭിക്കാത്തവരോ അല്ലെങ്കിൽ അപൂർണ്ണമായ ടെസ്റ്റ് രജിസ്ട്രേഷൻ കാർഡുള്ളവരോ 119 എന്ന നമ്പറിൽ വിളിച്ച് ഉടൻ മുന്നോട്ട് വരാൻ അധികൃതർ ആവശ്യപ്പെട്ടിട്ടുണ്ട്. അതേസമയം, ബ്രിസ്റ്റോളിന്റെ പ്രാന്തപ്രദേശത്തുള്ള സൗത്ത് ഗ്ലോസ്റ്റർഷയറിൽ അഞ്ച് പോസ്റ്റ് കോഡ് പ്രദേശങ്ങളിൽ താമസിക്കുന്നവരെ രോഗലക്ഷണങ്ങളില്ലെങ്കിൽ പോലും പരിശോധനയ്ക്ക് ക്ഷണിക്കുന്നു. പോസ്റ്റ്‌കോഡുകളിൽ ബ്രാഡ്‌ലി സ്റ്റോക്ക്, പാച്ച്‌വേ, ലിറ്റിൽ സ്റ്റോക്ക് എന്നിവയും ഉൾപ്പെടുന്നു.
സ്‌കോട്ട്‌ലൻഡിലെ കേസുകൾ സംബന്ധിച്ച്, മൂന്ന് പേർ സ്വയം നിരീക്ഷണത്തിലാണ്. ഇവർക്ക് പോസിറ്റീവ് സ്ഥിരീകരിച്ചതായി സർക്കാർ അറിയിച്ചു. ലണ്ടനിൽ നിന്ന് ആബർ‌ഡീനിലേക്കുള്ള അതേ വിമാനത്തിലുണ്ടായിരുന്ന മറ്റ് യാത്രക്കാരെ ഇപ്പോൾ അധികൃതർ ബന്ധപ്പെടുന്നുണ്ട്.