1 GBP = 123.43
breaking news

പ്രാഗിൽ രണ്ട് ട്രെയിനുകൾ കൂട്ടിയിടിച്ച് അപകടം; 46 പേർക്ക് പരിക്ക്, ഡ്രൈവർമാരുടെ നില ഗുരുതരം

പ്രാഗിൽ രണ്ട് ട്രെയിനുകൾ കൂട്ടിയിടിച്ച് അപകടം; 46 പേർക്ക് പരിക്ക്, ഡ്രൈവർമാരുടെ നില ഗുരുതരം

പ്രാഗ്: ചെക്ക് റിപ്പബ്ലിക്കിന്റെ തലസ്ഥാനമായ പ്രാഗിൽ രണ്ട് യാത്രാ ട്രെയിനുകൾ നേർക്കുനേർ കൂട്ടിയിടിച്ച് കുറഞ്ഞത് 46 പേർക്ക് പരിക്കേറ്റു. തിരക്കേറിയ രാവിലെയായിരുന്നു അപകടം. പരിക്കേറ്റവരിൽ ട്രെയിനുകളുടെ രണ്ട് ഡ്രൈവർമാരും ഉൾപ്പെടുന്നതായാണ് റിപ്പോർട്ടുകൾ.

പ്രാദേശിക സമയം രാവിലെ ഏഴോടെ സെയ്ഫെർട്ടോവ സ്ട്രീറ്റിലെ റെയിൽവേ മേൽപ്പാലത്തിലായിരുന്നു അപകടം. കുറഞ്ഞ വേഗത്തിലായിരുന്ന ട്രെയിനുകളാണ് കൂട്ടിയിടിച്ചതെന്നാണ് പ്രാഥമിക വിവരം.

പ്രാഗ് അടിയന്തര സേവന വിഭാഗത്തിന്റെ കണക്കനുസരിച്ച് നാല് പേർക്ക് ഗുരുതരമായി പരിക്കേറ്റു. 12 പേർക്ക് മിതമായ പരിക്കും 30 പേർക്ക് നിസ്സാര പരിക്കുമേറ്റു. പരിക്കേറ്റവരിൽ 16 വിദേശ പൗരന്മാരെ ആശുപത്രിയിൽ പ്രവേശിപ്പിച്ചതായും ചെക്ക് വാർത്താ ഏജൻസിയായ CTK റിപ്പോർട്ട് ചെയ്തു. പരിക്കേറ്റവരിൽ ബ്രിട്ടീഷ് പൗരന്മാരുണ്ടോയെന്ന് സ്ഥിരീകരിച്ചിട്ടില്ല.

അപകടം നടന്ന് നാല് മിനിറ്റിനുള്ളിൽ തന്നെ രക്ഷാപ്രവർത്തകർ സ്ഥലത്തെത്തി. പത്തിലധികം ആംബുലൻസുകളും ഡോക്ടർമാരടങ്ങിയ നാല് അടിയന്തര മെഡിക്കൽ സംഘങ്ങളും പ്രത്യേക രക്ഷാസംഘവും ഉൾപ്പെടെ വിപുലമായ സംവിധാനങ്ങളാണ് രക്ഷാപ്രവർത്തനത്തിന് വിന്യസിച്ചത്. രാവിലെ 9.40ഓടെ പ്രധാന രക്ഷാപ്രവർത്തനങ്ങൾ പൂർത്തിയായി.

ട്രെയിൻ ചുവപ്പ് സിഗ്നൽ മറികടന്നതാകാം അപകടത്തിന് കാരണമെന്നാണ് പ്രാഥമിക നിഗമനമെന്ന് ഗതാഗതമന്ത്രി ഇവാൻ ബെഡ്നാറിക് പ്രതികരിച്ചു. എന്നാൽ അപകടത്തിന്റെ കൃത്യമായ കാരണം ഇതുവരെ സ്ഥിരീകരിച്ചിട്ടില്ല. റെയിൽവേ ഇൻസ്പെക്ടർമാരും അന്വേഷണ ഉദ്യോഗസ്ഥരും സംയുക്തമായി അന്വേഷണം ആരംഭിച്ചിട്ടുണ്ട്. അപകടത്തിന് ഉത്തരവാദികളായവരെ കണ്ടെത്തുമെന്നും മന്ത്രി വ്യക്തമാക്കി.

അപകടത്തെത്തുടർന്ന് പ്രാഗിലെ റെയിൽ ഗതാഗതം തടസ്സപ്പെട്ടു. ബാധിത പാതയിലൂടെയുള്ള നിരവധി സർവീസുകൾ വഴിതിരിച്ചുവിട്ടതിനാൽ നഗരത്തിൽ ഇന്നും ഗതാഗത തടസ്സം തുടരാനിടയുണ്ട്.

കഴിഞ്ഞ മാസം ഒക്ടോബർ 28ന് സ്പെയിനിലെ ടൊലീഡോ പ്രവിശ്യയിൽ രണ്ട് ട്രെയിനുകൾ കൂട്ടിയിടിച്ചുണ്ടായ വൻ ദുരന്തത്തിന് പിന്നാലെയാണ് യൂറോപ്പിനെ വീണ്ടും നടുക്കി പ്രാഗിൽ റെയിൽ അപകടമുണ്ടായിരിക്കുന്നത്. സ്പെയിനിലെ അപകടത്തിൽ 69 പേർ മരിക്കുകയും 200ലധികം പേർക്ക് പരിക്കേൽക്കുകയും ചെയ്തിരുന്നു.

Latest News:

Post Your Comments Here ( Click here for malayalam )

Press Esc to close
show more