1 GBP = 122.89
breaking news

റഷ്യയ്ക്കുവേണ്ടി ചാരവൃത്തി നടത്തിയെന്ന സംശയം; ബ്രിട്ടനിൽ അറസ്റ്റിലായ യുഎസ് സൈനിക ഉദ്യോഗസ്ഥൻ അമേരിക്കൻ സൈനിക കസ്റ്റഡിയിൽ

റഷ്യയ്ക്കുവേണ്ടി ചാരവൃത്തി നടത്തിയെന്ന സംശയം; ബ്രിട്ടനിൽ അറസ്റ്റിലായ യുഎസ് സൈനിക ഉദ്യോഗസ്ഥൻ അമേരിക്കൻ സൈനിക കസ്റ്റഡിയിൽ

ലണ്ടൻ: റഷ്യയ്ക്കുവേണ്ടി ചാരവൃത്തി നടത്തിയെന്ന സംശയത്തെ തുടർന്ന് ബ്രിട്ടനിൽ അറസ്റ്റിലായ മുതിർന്ന യുഎസ് സൈനിക ഉദ്യോഗസ്ഥൻ ലെഫ്റ്റനന്റ് കേണൽ ബ്രാൻഡൻ കരോൾ ടൈനർ അമേരിക്കൻ സൈനിക കസ്റ്റഡിയിലായി. ബ്രിട്ടീഷ് കൗണ്ടർ ടെററിസം പൊലീസ് നടത്തിയ അന്വേഷണത്തിനൊടുവിലാണ് 41കാരനായ ടൈനറെ അമേരിക്കൻ അധികൃതർക്ക് കൈമാറിയത്.

നവംബർ 10ന് ഗ്ലോസ്റ്റർഷെയറിലെ ഇൻസ്വർത്ത് പ്രദേശത്തുനിന്നാണ് ടൈനറെ ബ്രിട്ടീഷ് പൊലീസ് അറസ്റ്റ് ചെയ്തത്. ചാരവൃത്തിയുമായി ബന്ധപ്പെട്ട കുറ്റകൃത്യങ്ങൾ സംശയിച്ച് നാഷണൽ സെക്യൂരിറ്റി ആക്ടിലെ സെക്ഷൻ 1, 3 പ്രകാരമായിരുന്നു നടപടി. ഗ്ലോസ്റ്റർഷെയറിലെ ഇംജിൻ ബാരക്കിലായിരുന്നു ഇദ്ദേഹം സേവനമനുഷ്ഠിച്ചിരുന്നത്. നാറ്റോയുടെ അലൈഡ് റാപ്പിഡ് റിയാക്ഷൻ കോർപ്സിന്റെ ആസ്ഥാനമാണ് ഈ സൈനിക കേന്ദ്രം.

ബ്രിട്ടീഷ് കൗണ്ടർ ടെററിസം പൊലീസും അമേരിക്കൻ സൈന്യവും എഫ്ബിഐയും ഉൾപ്പെടെയുള്ള ഏജൻസികൾ സംയുക്തമായാണ് അന്വേഷണം നടത്തിയത്. ഗ്ലോസ്റ്റർഷെയറിലെ രണ്ട് സ്ഥലങ്ങളിൽ പൊലീസ് പരിശോധനയും നടത്തിയിരുന്നു. തുടർന്ന് ബ്രിട്ടീഷ് പ്രോസിക്യൂഷൻ വിഭാഗവും അറ്റോർണി ജനറൽ ഓഫീസും അമേരിക്കൻ അധികൃതരുമായി നടത്തിയ ചർച്ചകൾക്കൊടുവിൽ അന്വേഷണം അമേരിക്കൻ ഏജൻസികൾക്ക് കൈമാറാൻ തീരുമാനിക്കുകയായിരുന്നു.

എഫ്ബിഐ ഡയറക്ടർ കാഷ് പട്ടേൽ ചൊവ്വാഴ്ച പുറത്തിറക്കിയ പ്രസ്താവനയിൽ, രാജ്യത്തിന്റെ സുരക്ഷയ്ക്ക് ഭീഷണിയാകുന്നവർക്കെതിരെ വിട്ടുവീഴ്ചയില്ലാത്ത നടപടിയുണ്ടാകുമെന്ന് വ്യക്തമാക്കി. കഴിഞ്ഞ 21 മാസത്തിനിടെ ചാരവൃത്തിയും കൗണ്ടർ ഇന്റലിജൻസുമായി ബന്ധപ്പെട്ട 167 അറസ്റ്റുകൾ നടത്തിയതായും മുൻകാലത്തെ അപേക്ഷിച്ച് ഇത് 53 ശതമാനം വർധനയാണെന്നും അദ്ദേഹം പറഞ്ഞു.

അമേരിക്കൻ സൈന്യത്തിന്റെ കൗണ്ടർ ഇന്റലിജൻസ് വിഭാഗം, എഫ്ബിഐ, ബ്രിട്ടീഷ് കൗണ്ടർ ടെററിസം പൊലീസ്, എംഐ5, യുകെ ഡിഫൻസ് കൗണ്ടർ ഇന്റലിജൻസ് വിഭാഗം എന്നിവയുടെ സഹകരണമാണ് കേസിൽ നിർണായകമായതെന്നും അദ്ദേഹം കൂട്ടിച്ചേർത്തു.

2008ലാണ് ടൈനർ അമേരിക്കൻ സൈന്യത്തിൽ ചേർന്നത്. സീനിയർ ഹ്യൂമൻ റിസോഴ്‌സസ് ഓഫീസറായി സേവനമനുഷ്ഠിച്ചിരുന്ന ഇദ്ദേഹം ഇറാഖ്, ഖത്തർ, അഫ്ഗാനിസ്ഥാൻ എന്നിവിടങ്ങളിലും സൈനിക ദൗത്യങ്ങളുടെ ഭാഗമായി പ്രവർത്തിച്ചിട്ടുണ്ട്.

അമേരിക്കൻ സൈന്യത്തിലെ ഉദ്യോഗസ്ഥർ സത്യപ്രതിജ്ഞാ ലംഘനം നടത്തുകയോ സഹപ്രവർത്തകരുടെ വിശ്വാസം വഞ്ചിക്കുകയോ ചെയ്താൽ കർശന നടപടി സ്വീകരിക്കുമെന്ന് ബ്രിഗേഡിയർ ജനറൽ സീൻ സ്റ്റിൻചൺ മുന്നറിയിപ്പ് നൽകി. ഇത്തരം നടപടികൾ രാജ്യത്തിന്റെ സുരക്ഷയ്ക്കും സൈനികരുടെ കൂട്ടായ പ്രതിരോധ സംവിധാനത്തിനും ഭീഷണിയാണെന്നും അദ്ദേഹം പറഞ്ഞു.

അതേസമയം, ടൈനർക്കെതിരായ ആരോപണങ്ങൾ സംബന്ധിച്ച വിശദാംശങ്ങൾ ഔദ്യോഗികമായി പുറത്തുവിട്ടിട്ടില്ല. കേസ് അമേരിക്കൻ അധികൃതർ തുടർനടപടികൾക്കായി ഏറ്റെടുത്തിരിക്കുകയാണ്. ആരോപണങ്ങൾ തെളിയിക്കപ്പെട്ടതായി ഇതുവരെ സ്ഥിരീകരിച്ചിട്ടില്ല.

Latest News:

Post Your Comments Here ( Click here for malayalam )

Press Esc to close
show more