1 GBP = 122.89
breaking news

ബ്രിട്ടീഷ് പോലീസിൽ നിഷ്പക്ഷത ഉറപ്പാക്കാൻ പുതിയ മാർഗനിർദേശങ്ങൾ; ‘രണ്ടുതരം നീതി’ ആരോപണങ്ങൾക്കെതിരെ ഷബാന മഹ്മൂദ്

ബ്രിട്ടീഷ് പോലീസിൽ നിഷ്പക്ഷത ഉറപ്പാക്കാൻ പുതിയ മാർഗനിർദേശങ്ങൾ; ‘രണ്ടുതരം നീതി’ ആരോപണങ്ങൾക്കെതിരെ ഷബാന മഹ്മൂദ്

ലണ്ടൻ: ബ്രിട്ടനിൽ പോലീസിന്റെ നിഷ്പക്ഷത ഉറപ്പാക്കുന്നതിനും ‘രണ്ടുതരം പോലീസ് സംവിധാനം’ (Two-tier Policing) എന്ന ആരോപണങ്ങൾക്കു തടയിടുന്നതിനുമായി ശക്തമായ പുതിയ മാർഗനിർദേശങ്ങൾ പ്രഖ്യാപിക്കാനൊരുങ്ങി ആഭ്യന്തര സെക്രട്ടറി ഷബാന മഹ്മൂദ്.

നിയമം നടപ്പാക്കുമ്പോൾ വംശം, മതം, രാഷ്ട്രീയം തുടങ്ങിയ ഘടകങ്ങൾ പരിഗണിക്കാതെ എല്ലാവരോടും ഒരേ രീതിയിൽ പെരുമാറണമെന്ന് പോലീസ് മേധാവികളുടെ സമ്മേളനത്തിൽ അവർ ആവശ്യപ്പെടും. സമത്വം ഉറപ്പാക്കാനുള്ള ശ്രമങ്ങൾ വ്യത്യസ്ത വിഭാഗങ്ങളോട് വ്യത്യസ്തമായ സമീപനത്തിലേക്ക് നയിക്കുന്ന സാഹചര്യം ഒഴിവാക്കണമെന്നും അവർ മുന്നറിയിപ്പ് നൽകും.

ബ്രിട്ടീഷ് പോലീസിനെതിരെ അടുത്തകാലത്തായി ഉയർന്നുവരുന്ന ഇരട്ടത്താപ്പ് ആരോപണങ്ങൾ പ്രധാനമായും വലതുപക്ഷ രാഷ്ട്രീയ നേതാക്കളിൽ നിന്നാണ്. കുത്തേറ്റു മരിച്ചുകൊണ്ടിരുന്ന ഹെൻറി നൊവാക്കിനെ പോലീസ് അറസ്റ്റ് ചെയ്ത സംഭവവും ഈ വിവാദത്തിന് ആക്കം കൂട്ടിയിരുന്നു. ഹെൻറിയെ കുത്തിയ വിക്രം ദിഗ്‌വ, കൊല്ലപ്പെട്ട യുവാവ് വംശീയ അധിക്ഷേപം നടത്തിയെന്നാരോപിച്ചതിനെ തുടർന്നായിരുന്നു പോലീസ് നടപടി.

വെള്ളക്കാരായ ആളുകളോട് അവരുടെ വംശത്തിന്റെ പേരിൽ പോലീസ് വ്യത്യസ്തമായാണ് പെരുമാറുന്നതെന്ന് റിഫോം യുകെ നേതാവ് നൈജൽ ഫറാജ് ആരോപിച്ചിരുന്നു. എന്നാൽ, ഇത്തരം വാദങ്ങൾ കറുത്ത വർഗക്കാരും മറ്റ് വംശീയ ന്യൂനപക്ഷങ്ങളും ദീർഘകാലമായി നേരിടുന്ന വിവേചനാനുഭവങ്ങളെ അവഗണിക്കുന്നതാണെന്ന് വിമർശകർ ചൂണ്ടിക്കാട്ടുന്നു. മുതിർന്ന പോലീസ് ഉദ്യോഗസ്ഥരിൽ ചിലരും രണ്ടുതരം പോലീസ് സംവിധാനമുണ്ടെന്ന ആരോപണം തള്ളിയിട്ടുണ്ട്.

എല്ലാ ജനങ്ങൾക്കും തുല്യപരിഗണന ഉറപ്പാക്കുന്നതിനായി പുതിയ ദേശീയ നിലവാരവും സമഗ്രമായ മാർഗനിർദേശങ്ങളും വികസിപ്പിച്ചുവരികയാണെന്ന് ഹോം ഓഫീസ് അറിയിച്ചു. ഭയമോ പക്ഷപാതമോ കൂടാതെ നിയമം നടപ്പാക്കുക എന്നതാണ് പോലീസിന്റെ അടിസ്ഥാന ഉത്തരവാദിത്തമെന്ന് ഷബാന മഹ്മൂദ് വ്യക്തമാക്കും.

സമൂഹങ്ങളുമായുള്ള പോലീസിന്റെ ഇടപെടലുകൾ രാഷ്ട്രീയ ലക്ഷ്യങ്ങൾക്കായി പ്രവർത്തിക്കുന്ന ആക്ടിവിസ്റ്റുകളുമായുള്ള സഹകരണമായി മാറരുതെന്നും അവർ മുന്നറിയിപ്പ് നൽകും. റസിഡന്റ്സ് അസോസിയേഷൻ യോഗങ്ങളിൽ പങ്കെടുക്കുന്നതും നാട്ടുകാരുമായി സൗഹൃദപരമായി ഇടപഴകുന്നതുമാണ് യഥാർഥ കമ്മ്യൂണിറ്റി ബന്ധമെന്നും രാഷ്ട്രീയ കാര്യങ്ങൾ രാഷ്ട്രീയക്കാർക്ക് വിട്ടുകൊടുത്ത് പോലീസ് നിയമപാലനത്തിൽ ശ്രദ്ധ കേന്ദ്രീകരിക്കണമെന്നും അവർ പറയും.

അതേസമയം, പോലീസ് സേനയ്ക്കുള്ളിലെ അസമത്വങ്ങൾ പരിഹരിക്കേണ്ടതുണ്ടെന്നും കറുത്ത വർഗക്കാരായ ഉദ്യോഗസ്ഥരുടെ പ്രാതിനിധ്യം ഇപ്പോഴും വളരെ കുറവാണെന്നും ആഭ്യന്തര സെക്രട്ടറി ചൂണ്ടിക്കാട്ടും. വംശീയ വിവേചനം ഇല്ലാതാക്കുന്നതിനായി നടപ്പാക്കിയ ചില പദ്ധതികൾ, പ്രത്യേകിച്ച് പോലീസ് ആന്റി റേസിസം പ്രതിബദ്ധത പോലുള്ളവ, നിഷ്പക്ഷമായ പോലീസ് സംവിധാനത്തിലുള്ള പൊതുജനവിശ്വാസത്തെ പ്രതികൂലമായി ബാധിച്ചിട്ടുണ്ടെന്നും അവർ അഭിപ്രായപ്പെടും.

മുസ്ലിം വനിതയായ ആഭ്യന്തര സെക്രട്ടറി എന്ന നിലയിൽ പോലീസ് സേനയിലും നിയമനടപടികളിലും സമത്വം ഉറപ്പാക്കേണ്ടതിന്റെ പ്രാധാന്യം തനിക്ക് വ്യക്തമായി അറിയാമെന്ന് അവർ വ്യക്തമാക്കും. എന്നാൽ സമത്വം നടപ്പാക്കാനുള്ള ശ്രമങ്ങൾ തന്നെ ചില വിഭാഗങ്ങൾക്ക് പ്രത്യേക പരിഗണന നൽകുന്ന രീതിയിലേക്ക് മാറരുതെന്നും അവർ കൂട്ടിച്ചേർക്കും.

പോലീസിന്റെ നിലവാരവും പ്രവർത്തനരീതിയും നിശ്ചയിക്കുന്ന കോളേജ് ഓഫ് പോലീസിംഗ് മേധാവി ജോ നോക്‌സും പുതിയ മാർഗനിർദേശങ്ങൾ പുറത്തിറക്കുമെന്ന് അറിയിച്ചു. അടുത്ത വസന്തകാലത്തോടെ ഉദ്യോഗസ്ഥർക്കുള്ള മാർഗനിർദേശങ്ങൾ പ്രസിദ്ധീകരിക്കാനാണ് ലക്ഷ്യമിടുന്നത്.

പൊതുജനവിശ്വാസം നിലനിർത്തണമെങ്കിൽ പോലീസ് ഉദ്യോഗസ്ഥർ അധികാരം ഭയമോ പക്ഷപാതമോ കൂടാതെ വിനിയോഗിക്കണം. അതേസമയം, നിഷ്പക്ഷത എന്നത് ഒറ്റയ്ക്ക് വിലയിരുത്തേണ്ട ഒന്നല്ലെന്നും പോലീസ് സേനയ്ക്കുള്ളിലും പൊതുജനങ്ങളോടുള്ള ഇടപെടലുകളിലും നീതിയും തുല്യപരിഗണനയും ഉറപ്പാക്കേണ്ടതുണ്ടെന്നും ജോ നോക്‌സ് വ്യക്തമാക്കി.

പോലീസിന്റെ നിഷ്പക്ഷത സംരക്ഷിക്കുന്നതിനൊപ്പം വംശീയ അസമത്വങ്ങൾ പരിഹരിക്കുകയും പൊതുജനവിശ്വാസം ശക്തിപ്പെടുത്തുകയും ചെയ്യുക എന്നതാണ് പുതിയ മാർഗനിർദേശങ്ങളിലൂടെ ബ്രിട്ടീഷ് സർക്കാർ ലക്ഷ്യമിടുന്നത്.

Latest News:

Post Your Comments Here ( Click here for malayalam )

Press Esc to close
show more