യുക്മ –  ഇസ ലണ്ടൻ കേരളപൂരം വളളംകളി 2026 ഇനി ഒരാഴ്ച മാത്രം…..ആറ്, ഏഴ് ഹീറ്റ്സുകളിലെ ടീമുകളെ പരിചയപ്പെടാം….

കുര്യൻ ജോർജ്ജ്

(നാഷണൽ പി.ആർ.ഒ & മീഡിയ കോർഡിനേറ്റർ)

യുക്മ –  ഇസ ലണ്ടൻ കേരളപൂരം വളളംകളി 2026 ഓഗസ്റ്റ് 15 ന് റോഥർഹാമിലെ മാൻവേഴ്സ്  തടാകത്തിൽ അരങ്ങേറുവാൻ ദിവസങ്ങൾ അടുത്ത് വരവെ അതിൻ്റെ ആവേശം ഓരോ നിമിഷവും കൂടി വരുമ്പോൾ ഇന്ന് രണ്ടാമത്തെ ഹീറ്റ്സിൽ മത്സരിക്കുന്ന കാരിച്ചാൽ, വേമ്പനാട്, നെടുമുടി എന്നീ ടീമുകളെ പരിചയപ്പെടാം.

യുക്മ കേരളപൂരം വള്ളംകളി 2026: ഹീറ്റ്സ്–6ൽ കിടങ്ങറ, തകഴി, ചെറുതന നേർക്കുനേർ

യുക്മ കേരളപൂരം വള്ളംകളി 2026-ലെ ആറാം ഹീറ്റ് പരിചയസമ്പത്തും ആത്മവിശ്വാസവും വിജയവാശിയും ഒത്തുചേരുന്ന മറ്റൊരു ആവേശപ്പോരിന് വേദിയൊരുക്കുകയാണ്. കിടങ്ങറ, തകഴി, ചെറുതന എന്നീ പ്രശസ്ത ചുണ്ടൻവള്ളങ്ങളിൽ യുകെയിലെ മൂന്ന് ശക്തരായ ബോട്ട് ക്ലബ്ബുകൾ അടുത്ത റൗണ്ടിലേക്കുള്ള പ്രവേശനം ലക്ഷ്യമിട്ട് അണിനിരക്കുന്നു.

കിടങ്ങറ – എൻ എം സി എ ബോട്ട് ക്ലബ്ബ്, നോട്ടിംങ്ഹാം (NMCA Boat Club, Nottingham)

ചരിത്രപ്രസിദ്ധമായ കിടങ്ങറ ചുണ്ടനിൽ ഇത്തവണ മത്സരിക്കുന്നത് NMCA Boat Club, Nottingham ആണ്. അലൻ എ. സാം ക്യാപ്റ്റനായുള്ള ടീം മികച്ച മുന്നൊരുക്കങ്ങളോടെയും ആത്മവിശ്വാസത്തോടെയുമാണ് യുക്മ കേരളപൂരം വള്ളംകളിയിലേക്ക് എത്തുന്നത്.

നോട്ടിങ്ഹാമിലെ മലയാളി സമൂഹത്തിന്റെ ശക്തമായ പിന്തുണയോടെ പ്രവർത്തിക്കുന്ന NMCA ബോട്ട് ക്ലബ്, കൃത്യമായ പരിശീലനവും കൂട്ടായ്മയുടെ കരുത്തും കൈമുതലാക്കി മികച്ച പ്രകടനം കാഴ്ചവെക്കാനാണ് ലക്ഷ്യമിടുന്നത്. Life Protect Line Mortgage & Insurance Services ആണ് ടീമിന്റെ സ്പോൺസർ.

തകഴി – ഫ്രണ്ട്സ് ബോട്ട് ക്ലബ്, ഹൾ (Friends Boat Club, Hull)

Friends Boat Club, Hull ആണ് ഇത്തവണ തകഴി ചുണ്ടനിൽ മത്സരരംഗത്തിറങ്ങുന്നത്. മെബിൾ വർഗീസ് നയിക്കുന്ന ടീം ചിട്ടയായ പരിശീലനവും മികച്ച ടീംവർക്കും കരുത്താക്കി വിജയപ്രതീക്ഷയോടെയാണ് മത്സരത്തിനെത്തുന്നത്.

ഹള്ളിലെ മലയാളി സമൂഹത്തിന്റെ കൂട്ടായ്മയിൽ രൂപംകൊണ്ട ഫ്രണ്ട്സ് ബോട്ട് ക്ലബ്, വള്ളംകളിയുടെ ആവേശവും കേരളത്തിന്റെ പൈതൃകവും ഒരുപോലെ ഉയർത്തിപ്പിടിച്ചുകൊണ്ട് ശ്രദ്ധേയമായ പ്രകടനം ലക്ഷ്യമിടുന്നു. Theresas London ആണ് ടീമിന്റെ സ്പോൺസർ.

ചെറുതന – സി എം എ കാർഡിഫ് ചുണ്ടൻ ബോട്ട് ക്ലബ്, വെയിൽസ് (CMA Cardiff Chundan Boat Club, Wales)

ആറാം ഹീറ്റിൽ കിടങ്ങറയോടും തകഴിയോടും ഏറ്റുമുട്ടുന്നത് ചെറുതന ചുണ്ടനാണ്. വെയിൽസിനെ പ്രതിനിധീകരിക്കുന്ന CMA Cardiff Chundan Boat Club ആണ് ഇത്തവണ ചെറുതന വള്ളത്തിൽ മത്സരിക്കുന്നത്. ബിനോ ആന്റണിയാണ് ടീം ക്യാപ്റ്റൻ.

അനുഭവസമ്പത്തും അച്ചടക്കമുള്ള പരിശീലനവും ടീമിന്റെ പ്രധാന ശക്തിയാണ്. ശക്തരായ എതിരാളികൾക്കിടയിലും മികച്ച പ്രകടനം കാഴ്ചവെച്ച് അടുത്ത റൗണ്ടിലേക്ക് മുന്നേറാനാണ് ടീമിന്റെ ലക്ഷ്യം. My Local Indian – Mattancherry, Taunton ആണ് ടീമിന്റെ സ്പോൺസർ.

ആറാം ഹീറ്റിൽ ആവേശം കൊടുമുടിയിൽ

നോട്ടിങ്ഹാമിന്റെ കരുത്തുമായി കിടങ്ങറ, ഹള്ളിന്റെ ആത്മവിശ്വാസവുമായി തകഴി, വെയിൽസിന്റെ പോരാട്ടവീര്യവുമായി ചെറുതന – ഈ മൂന്ന് ടീമുകളുടെ ഏറ്റുമുട്ടൽ ഹീറ്റ്സ്–6നെ ശ്രദ്ധേയമായ മത്സരങ്ങളിലൊന്നാക്കി മാറ്റുന്നു. കഠിന പരിശീലനവും വിജയവാശിയും കൈമുതലാക്കി വെള്ളത്തിലിറങ്ങുന്ന ഈ ടീമുകളിൽ ആരൊക്കെയാകും അടുത്ത റൗണ്ടിലേക്കുള്ള ടിക്കറ്റ് ഉറപ്പാക്കുക എന്നറിയാൻ ആഗസ്റ്റ് 15-ന് റോതർഹാമിലെ മാൻവേഴ്സ് ലേക്ക് കാത്തിരിക്കുകയാണ് വള്ളംകളി പ്രേമികൾ.

യുക്മ കേരളപൂരം വള്ളംകളി 2026: ഹീറ്റ്സ്–7ൽ കാവാലം, വൈക്കം, നീലംപേരൂർ നേർക്കുനേർ

യുക്മ കേരളപൂരം വള്ളംകളി 2026-ലെ ഏഴാം ഹീറ്റ് ആവേശം നിറഞ്ഞ മറ്റൊരു പോരാട്ടത്തിനാണ് വേദിയൊരുക്കുന്നത്. ഇംഗ്ലണ്ടിന്റെ വിവിധ ഭാഗങ്ങളിൽ നിന്നുള്ള മൂന്ന് ശക്തരായ ബോട്ട് ക്ലബ്ബുകൾ കാവാലം, വൈക്കം, നീലംപേരൂർ എന്നീ ചരിത്രപ്രസിദ്ധമായ ചുണ്ടൻവള്ളങ്ങളിൽ അണിനിരക്കുമ്പോൾ മത്സരം തീപാറുമെന്നതിൽ സംശയമില്ല.

കാവാലം – കൊമ്പൻ ബോട്ട് ക്ലബ്ബ്,ബോൾട്ടൻ (Kombans Boat Club, Bolton)

ഏഴാം ഹീറ്റിൽ കാവാലം ചുണ്ടനിൽ മത്സരിക്കുന്നത് Kombans Boat Club, Bolton ആണ്. കഴിഞ്ഞ വർഷത്തെ യുക്മ ട്രോഫി നേടിയ ചാമ്പ്യൻമാരായ ടീമാണ് കൊമ്പൻസ് ബോൾട്ടൻ. കിരീടം നിലനിർത്താൻ തന്നെയാണ് പരിചയസമ്പന്നനായ മോനിച്ചൻ കിഴക്കേച്ചിറയുടെ നേതൃത്വത്തിലുള്ള ടീം  വെള്ളത്തിലിറങ്ങുന്നത്.

കൃത്യമായ പരിശീലനവും മികച്ച ടീം വർക്കും കൈമുതലാക്കിയ കോമ്പൻസ് ബോട്ട് ക്ലബ്, ഈ വർഷം ശ്രദ്ധേയമായ പ്രകടനം കാഴ്ചവെച്ച് അടുത്ത റൗണ്ടിലേക്ക് മുന്നേറാൻ ആത്മവിശ്വാസത്തിലാണ്. Life Line Protect ആണ് ടീമിന്റെ സ്പോൺസർ.

വൈക്കം – നോർത്താംപ്റ്റൺ ബോട്ട് ക്ലജ് (Northampton Boat Club

Northampton Boat Club ആണ് ഇത്തവണ വൈക്കം ചുണ്ടനിൽ മത്സരിക്കുന്നത്. മനോജ് പരമേശ്വരൻ ക്യാപ്റ്റനായുള്ള ടീം മികച്ച മുന്നൊരുക്കങ്ങളോടെയാണ് യുക്മ കേരളപൂരം വള്ളംകളിയിലേക്ക് എത്തുന്നത്.

പരിശീലനത്തിലെ അച്ചടക്കവും കൂട്ടായ്മയുടെ കരുത്തും വിജയത്തിലേക്കുള്ള ദൃഢനിശ്ചയവുമാണ് ഈ ടീമിന്റെ പ്രധാന ശക്തി. ശക്തരായ എതിരാളികൾക്കിടയിലും മികച്ച പ്രകടനം കാഴ്ചവെച്ച് അടുത്ത ഘട്ടത്തിലേക്ക് യോഗ്യത നേടുക എന്നതാണ് ടീമിന്റെ ലക്ഷ്യം. മണവാട്ടി (Manavatty) ആണ് ടീമിന്റെ സ്പോൺസർ.

നീലംപേരൂർ – ഡബ്ളിയു എം എ ബോട്ട് ക്ലബ് സ്വിൻഡൻ (WMA Boat Club, Swindon)

ഏഴാം ഹീറ്റിൽ നീലംപേരൂർ ചുണ്ടനിൽ മത്സരിക്കുന്നത് WMA Boat Club, Swindon ആണ്. ജോബി ജോസ് നയിക്കുന്ന ടീം മികച്ച തയ്യാറെടുപ്പുകളോടെയും ആത്മവിശ്വാസത്തോടെയുമാണ് മത്സരരംഗത്തിറങ്ങുന്നത്.

പരിശീലനത്തിലെ മികവും ടീമംഗങ്ങളുടെ ഒത്തൊരുമയും വിജയത്തിലേക്കുള്ള ശക്തമായ ആഗ്രഹവുമാണ് WMA ബോട്ട് ക്ലബ്ബിന്റെ കരുത്ത്. മികച്ച പോരാട്ടത്തിലൂടെ പ്രേക്ഷകരുടെ കൈയടി നേടാനും അടുത്ത റൗണ്ടിലേക്ക് മുന്നേറാനുമാണ് ടീമിന്റെ ലക്ഷ്യം. Magnavision TV ആണ് ടീമിന്റെ സ്പോൺസർ.

ആവേശം നിറഞ്ഞ ഏഴാം ഹീറ്റ്

കാവാലത്തിന്റെ കരുത്തും വൈക്കത്തിന്റെ പോരാട്ടവീര്യവും നീലംപേരൂരിന്റെ ആത്മവിശ്വാസവും ഒരേ വേദിയിൽ ഏറ്റുമുട്ടുമ്പോൾ ഹീറ്റ്സ്–7 വള്ളംകളി പ്രേമികൾക്ക് മറക്കാനാവാത്ത കാഴ്ചവിരുന്നാകുമെന്നുറപ്പാണ്. കഠിന പരിശീലനത്തിലൂടെ കരുത്താർജിച്ച മൂന്ന് ടീമുകളും വിജയമാത്രം ലക്ഷ്യമിട്ട് തുഴയുമ്പോൾ, അടുത്ത റൗണ്ടിലേക്കുള്ള ടിക്കറ്റ് ആരൊക്കെയാകും സ്വന്തമാക്കുക എന്നറിയാൻ ആഗസ്റ്റ് 15-ന് റോതർഹാമിലെ മാൻവേഴ്സ് ലേക്ക് ആവേശത്തോടെ കാത്തിരിക്കുകയാണ്.

ഷെഫീൽഡിനടുത്ത് റോഥർഹാം മാൻവേഴ്സ് തടാകത്തിൽ വെച്ച് നടക്കുന്ന വള്ളംകളിയും അനുബന്ധ കലാപരിപാടികളും വൻ വിജയമാക്കുവാൻ യുക്മ ദേശീയ സമിതി പ്രസിഡൻ്റ് അഡ്വ. എബി സെബാസ്റ്റ്യൻ, ജനറൽ സെക്രട്ടറി ജയകുമാർ നായർ, ട്രഷറർ ഷീജോ വർഗ്ഗീസ് എന്നിവരുടെ നേതൃത്വത്തിൽ യുക്മ ദേശീയ, റീജിയണൽ ഭാരവാഹികളുടെ നേതൃത്വത്തിൽ വിപുലമായ ഒരുക്കങ്ങളാണ് നടത്തി വരുന്നത്.

വള്ളംകളിയോട് അനുബന്ധിച്ച് നടക്കുന്ന കാർണിവൽ പതിവ് പോലെ കാണികളെ ആകർഷിക്കുന്ന വിധത്തിലുള്ള വിവിധ പരിപാടികൾ കൊണ്ട് ഇക്കുറിയും അത്യാകർഷമാകും. യുക്മ ഷീ ലീഡ്സ് നേതൃത്വം നൽകുന്ന യുക്മ – തെരേസാസ് ‘ഓണച്ചന്തം സീസൺ 2’ മലയാളി സുന്ദരി മത്സരം, നൂറ് കണക്കിന് മലയാളി വനിതകൾ അണി നിരക്കുന്ന ‘മെഗാ തിരുവാതിര’, കേരളത്തിൻ്റെ സാംസ്കാരികത്തനിമ വിളിച്ചോതുന്ന ഓട്ടൻതുള്ളൽ, ഓണക്കാലത്ത് പൂര നഗരിയെ ഹരം പിടിപ്പിക്കുന്ന പുലികളി, യുകെയുടെ വിവിധ ഭാഗങ്ങളിൽ നിന്നെത്തുന്ന കലാകാരൻമാരും കലാകാരികളും അവതരിപ്പിക്കുന്ന നൃത്ത സംഗീത പരിപാടികൾ ഉൾപ്പടെ നിരവധി കലാപരിപാടികളാണ് വള്ളംകളി വേദിയിൽ അരങ്ങേറുന്നത്.

യുക്മ – ഇസ ലണ്ടൻ കേരളപൂരം വള്ളംകളി 2026 ടൈറ്റിൽ സ്പോൺസറായ ഇസ ലണ്ടനോടൊപ്പം ലൈഫ് ലൈൻ പ്രൊട്ടക്ട് ലിമിറ്റഡ്, തെരേസാസ് ലണ്ടൻ, പോൾ ജോൺ & കമ്പനി സോളിസിറ്റേഴ്‌സ്, മണവാട്ടി, LTC ഗ്ലോബൽ, ഏലൂർ കൺസൽട്ടൻസി, കേരള ഡിലൈറ്റ്സ് എന്നിവരും ഉടൻ റിലീസിനൊരുങ്ങുന്ന മനോഹരമായ മലയാള ചിത്രം ‘ബത്‌ലഹേം കുടുംബ യൂണിറ്റ്’ ഉം ആയിരിക്കും മറ്റ് പ്രധാന സ്പോൺസർമാർ.

യുക്മ – ഇസ ലണ്ടൻ കേരളപൂരം വള്ളംകളി 2026 സ്പോൺസർ ചെയ്യുന്നതിനും കൂടുതൽ വിവരങ്ങൾക്കുമായി താഴെ പറയുന്നവരെ ബന്ധപ്പെടേണ്ടതാണ് :-

അഡ്വ. എബി സെബാസ്റ്റ്യൻ – 07702862186

ജയകുമാർ നായർ – 07403223006

ഡിക്സ് ജോർജജ് – 07403312250.

യുക്മ – ഇസ ലണ്ടൻ കേരളപൂരം വള്ളംകളി 2026 നടക്കുന്ന വേദിയുടെ വിലാസം:-

Manvers Lake 

Station Road 

Wath-Upon-Dearne

Rotherham 

South Yorkshire.

S63 7DG.