ഐ ആം എ സെലിബ്രിറ്റി…ഷോയിൽ പങ്കെടുക്കാൻ മുൻ ആരോഗ്യമന്ത്രി മാറ്റ് ഹാൻകോക്; എംപിയെ സസ്‌പെൻഡ് ചെയ്ത് കൺസർവേറ്റിവ് പാർട്ടി

Nov 02, 2022

ലണ്ടൻ: ഓസ്‌ട്രേലിയയിലെ കാട്ടിൽ ഷൂട്ട് ചെയ്യുന്ന ഐ ആം എ സെലിബ്രിറ്റി.. ഗെറ്റ് മി ഔട്ട് ഓഫ് ഹിയർ റിയാലിറ്റി ഷോയിൽ പങ്കെടുക്കാൻ സമ്മതമറിയിച്ച മുൻ ആരോഗ്യമന്ത്രി മാറ്റ് ഹാൻകോക്കിനെ കൺസർവേറ്റിവ് പാർട്ടി സസ്‌പെൻഡ് ചെയ്തു. ഇതോടെ എംപിയായ മാറ്റ് ഹാൻകോക്കിന് ഇനി വെസ്റ്റ്മിൻസ്റ്ററിൽ സ്വതന്ത്രനായി ഇരിക്കേണ്ടി വരും.

തന്റെ തീരുമാനത്തെ ന്യായീകരിച്ച് മാറ്റ് ഹാൻകോക് രംഗത്തെത്തിയെങ്കിലും പാർലമെന്റ് നടക്കുന്ന സമയത്ത് റിയാലിറ്റി ടിവി ഷോയിൽ പങ്കെടുക്കാനുള്ള വെസ്റ്റ് സഫോക്ക് എംപിയുടെ തീരുമാനത്തെ ടോറി പാർട്ടി അംഗങ്ങൾ ചോദ്യം ചെയ്തു. ഹാൻകോക്കിന്റെ നടപടി “ഗുരുതരമാണ്” എന്ന് ടോറി ചീഫ് വിപ്പ് പറഞ്ഞു. ഹാൻ‌കോക്കിനോട് സംസാരിച്ചതിന് ശേഷമാണ് താൻ ഈ തീരുമാനമെടുത്തതെന്ന് ടോറി എംപിമാരുടെ അച്ചടക്കത്തിന്റെ ചുമതലയുള്ള സൈമൺ ഹാർട്ട് പറഞ്ഞു. വെസ്റ്റ് സഫോക്ക് കൺസർവേറ്റീവ് അസോസിയേഷന്റെ ഡെപ്യൂട്ടി ചെയർമാൻ ആൻഡി ഡ്രമ്മണ്ടും ഹാൻകോക്കിന്റെ നടപടിയെ നിശിതമായി വിമർശിച്ചു.

“രാജ്യത്തെ സംബന്ധിച്ചിടത്തോളം ഒരു വെല്ലുവിളി നിറഞ്ഞ സമയത്ത്, എംപിമാർ ജനങ്ങൾക്കായി കഠിനാധ്വാനം ചെയ്യണം, അത് വീട്ടിലായാലും അവരുടെ മണ്ഡലത്തിലായാലും” പ്രധാനമന്ത്രി വിശ്വസിക്കുന്നുവെന്ന് റിഷി സുനക്കിന്റെ വക്താവ് പറഞ്ഞു.

ഈ ആഴ്ച, ട്രഷറി സെലക്ട് കമ്മിറ്റിയുടെ അധ്യക്ഷനായുള്ള മത്സരത്തിൽ നിന്ന് ഹാൻ‌കോക്ക് പിന്മാറുകയും കോവിഡ് പ്രതിസന്ധി ഘട്ടത്തിൽ ആരോഗ്യ സെക്രട്ടറി എന്ന നിലയിലുള്ള തന്റെ അനുഭവങ്ങളെക്കുറിച്ച് പാൻഡെമിക് ഡയറീസ് എന്ന പുതിയ പുസ്തകം പ്രഖ്യാപിക്കുകയും ചെയ്തു. ഈ വർഷം മറ്റൊരു റിയാലിറ്റി ടിവി ഷോയിലും ഹാൻകോക് പങ്കെടുത്തതായാണ് റിപ്പോർട്ട്. ചാനൽ 4-ന്റെ സെലിബ്രിറ്റി ഷോയെന്നാണ് വിവരം.

സാമൂഹിക അകലം പാലിക്കുന്നതിനുള്ള കോവിഡ് നിയമങ്ങൾ ലംഘിച്ച് തന്റെ മിനിസ്റ്റീരിയൽ ഓഫീസിൽ വച്ച് തന്റെ ഏറ്റവും അടുത്ത സഹായിയായ ജിന കൊളാഡഞ്ചലോയെ ചുംബിക്കുന്നതിന്റെ സിസിടിവി ദൃശ്യങ്ങൾ ചോർന്നതിനെത്തുടർന്ന് ഹാൻ‌കോക്ക് കഴിഞ്ഞ വർഷം ആരോഗ്യ സെക്രട്ടറി സ്ഥാനം രാജിവച്ചിരുന്നു.