ബെയ്ജിങ് : ഹൂസ്റ്റണിലെ ചൈനീസ് കോണ്സുലേറ്റ് അടയ്ക്കാനുള്ള യുഎസ് നടപടിക്കു തിരിച്ചടിയായി ചൈനീസ് നഗരമായ ചെങ്ദുവിലെ യുഎസ് കോണ്സുലേറ്റിന്റെ പ്രവര്ത്തനം നിര്ത്താന് ചൈന ആവശ്യപ്പെട്ടു. ചെംഗ്ദു കോണ്സുലേറ്റ് അടയ്ക്കുന്നത് അമേരിക്കയുടെ യുക്തിരഹിതമായ നടപടികളോട് നിയമാനുസൃതവും ആവശ്യമായതുമായ പ്രതികരണമാണെന്നും നയതന്ത്ര ദൗത്യത്തിലെ ഉദ്യോഗസ്ഥര് ചൈനയുടെ സുരക്ഷയെയും താല്പ്പര്യങ്ങളെയും അപകടത്തിലാക്കുന്നുവെന്നും ബീജിംഗ് ആരോപിക്കുന്നു.
ഈ മാസം 21നാണ് ചാരവൃത്തിയും ബൗദ്ധിക സ്വത്തവകാശ മോഷണവും ആരോപിച്ച് ഹൂസ്റ്റണിലെ ചൈനീസ് കോണ്സുലേറ്റിന്റെ പ്രവര്ത്തനം അവസാനിപ്പിക്കാന് യുഎസ് ആവശ്യപ്പെട്ടത്. അന്ന് 72 മണിക്കൂര് സമയപരിധി ആണ് ചൈനയ്ക്ക് അമേരിക്ക നല്കിയത്. തുടര്ന്ന് സമയ പരിധി കഴിഞ്ഞ ഉടന് തന്നെ അധികൃതര് സ്ഥാപനം അടച്ചുപൂട്ടുകയായിരുന്നു. കൂടുതല് ചൈനീസ് കോണ്സുലേറ്റുകളോട് പ്രവര്ത്തനം നിര്ത്താന് ആവശ്യപ്പെടുമെന്ന് അന്ന് യുഎസ് പ്രസിഡന്റ് ഡോണള്ഡ് ട്രംപ് പറഞ്ഞിരുന്നു.
അതേസമയം അമേരിക്കകാര്ക്ക് ചെംഗ്ദുവില് നിന്ന് പുറത്തുപോകാനുള്ള സമയപരിധി വ്യക്തമല്ലെങ്കിലും എ.എഫ്.പി റിപ്പോര്ട്ട് അനുസരിച്ച് ശനിയാഴ്ച കോണ്സുലേറ്റില് നിന്ന് വലിയ കറുത്ത ബാഗുകള് ചവറ്റുകുട്ടകളില് കൊണ്ടുപോകുന്നത് ക്ലീനര്മാര് കണ്ടു എന്നും അതിലൊന്ന് പിളര്ന്നു കീറിപ്പറിഞ്ഞ കടലാസ് ഉള്ളതായി കാണപ്പെട്ടു എന്നും പറയുന്നു. പുലര്ച്ചെ കുറഞ്ഞത് പത്ത് ചാക്കുകളെങ്കിലും കെട്ടിടത്തില് നിന്ന് നീക്കം ചെയ്തിട്ടുണ്ടെന്നാണ് ലഭിക്കുന്ന റിപ്പോര്ട്ട്.
ഒരു ചെറിയ ക്രെയിനിലെ ഒരു തൊഴിലാളി കോണ്സുലേറ്റിന് മുന്നില് നിന്ന് ഒരു യുഎസ് ചിഹ്നം നീക്കം ചെയ്തു, ഇപ്പോള് അവിടെ ഒരു അമേരിക്കന് പതാക മാത്രമാണ് പറക്കുന്നത്. മറ്റ് സ്റ്റാഫുകള് ട്രോളികള് അകത്തേക്ക് കൊണ്ടുപോയതായി കണ്ടു എന്നും റിപ്പോര്ട്ട് ചെയ്യപ്പെട്ടിട്ടുണ്ട്. കോവിഡുമായി ബന്ധപ്പെട്ട ആരോപണ പ്രത്യാരോപണങ്ങളില് വഷളായ യുഎസ്ചൈന ബന്ധം ഇതോടെ കൂടുതല് മോശമായി. ടിബറ്റ് ഉള്പ്പെടെ ഒട്ടേറെ പ്രദേശങ്ങള് സിച്ചുവാന് പ്രവിശ്യയിലെ ചെങ്ദുവിലെ യുഎസ് കോണ്സുലേറ്റ് ജനറലിന്റെ പ്രവര്ത്തനപരിധിയിലാണ്.
click on malayalam character to switch languages