കെറ്ററിംഗിൽ മലയാളി മരണമടഞ്ഞു; വിടവാങ്ങിയത് കോട്ടയം കൈപ്പുഴ സ്വദേശിയായ ഷൈജു ഫിലിപ്പ് പൗവത്തിൽ

Mar 24, 2025

കെറ്ററിംഗ്‌: കെറ്ററിംഗിൽ മലയാളി മരണമടഞ്ഞു. കോട്ടയം കൈപ്പുഴ സ്വദേശിയായ ഷൈജു ഫിലിപ്പ് പൗവത്തിലാണ് മരണമടഞ്ഞത്. ഹൃദയാഘാതത്തെത്തുടർന്നായിരുന്നു അന്ത്യം. 51 വയസ്സ് മാത്രമായിരുന്നു പ്രായം.

ഇന്നലെ ഉച്ച കഴിഞ്ഞു വീട്ടിൽ വച്ചാണ് ഷൈജുവിന് ഹൃദയാഘാതമുണ്ടാകുന്നത്. തുടർന്ന് അടിയന്തിര വിഭാഗം വീട്ടിലെത്തി സിപിആർ നൽകി ആശുപത്രിയിൽ എത്തിക്കുകയായിരുന്നു. എന്നാൽ ഇന്നലെ മൂന്നേകാലോടെ അന്ത്യം സ്ഥിരീകരിക്കുകയായിരുന്നു.

കെറ്ററിംഗ്‌ മലയാളി അസോസിയേഷൻ സജീവ പ്രവർത്തകനായിരുന്ന ഷൈജു ഫിലിപ്പ് ഭാര്യ ലിൻസി ഷൈജുവിനും യൂണിവേഴ്‌സിറ്റി വിദ്യാർത്ഥിനിയായ മകൾ ആൻ മറിയ ഷൈജുവിനും എ ലെവൽ വിദ്യാർത്ഥിയായ അൻസിൽ ഷൈജുവിനുമൊപ്പം കെറ്ററിങ്ങിൽ തന്നെയായിരുന്നു താമസം.

മുൻ ഡൽഹി പോലീസ് ഉദ്യോഗസ്ഥനായിരുന്ന ഷൈജു പിലിപ്പ് കോട്ടയം കൈപ്പുഴ പാലത്തുരുത്ത് സെന്റ് തെരേസാസ് ക്നാനായ ഇടവകാംഗമാണ്. സംസ്കാരം സംബന്ധിച്ച കൂടുതൽ വിവരങ്ങൾ പിന്നീട് അറിയിക്കുമെന്ന് ബന്ധുക്കൾ പറഞ്ഞു.

ഷൈജു ഫിലിപ് പൗവത്തിലിന്റെ ആകസ്മിക വേർപാടിൽ യുക്മ ദേശീയ അധ്യക്ഷൻ അഡ്വ. എബി സെബാസ്റ്റ്യൻ, സെക്രട്ടറി ജയകുമാർ നായർ, ട്രഷറർ ഷീജോ വർഗ്ഗീസ്, ദേശീയ എക്സിക്യു്ട്ടീവ് കമ്മിറ്റിയംഗം ജോർജ്ജ് തോമസ്, മിഡ്ലാൻഡ്സ് റീജിയണൽ പ്രസിഡന്റ് അഡ്വ. ജോബി പുതുക്കുളങ്ങര, സെക്രട്ടറി ലൂയിസ് മേനാച്ചേരി, ട്രഷറർ പോൾ ജോസഫ്, കെറ്ററിംഗ്‌ മലയാളി അസോസിയേഷൻ ഭാരവാഹികളായ പ്രസിഡന്റ് സോബിൻ ജോൺ, സെക്രട്ടറി അലക്സ് തോട്ടം, ട്രഷറർ സജി തുടങ്ങിയവർ അനുശോചനം രേഖപ്പെടുത്തി. കുടുംബാംഗങ്ങളുടെ ദുഃഖത്തിൽ യുക്മ ന്യൂസും പങ്കുചേരുന്നു. ആദരാഞ്ജലികൾ…