ലണ്ടൻ: ബ്രിട്ടനിൽ പോസിറ്റീവ് ടെസ്റ്റുകൾ ഒരാഴ്ചയ്ക്കുള്ളിൽ മൂന്നിലൊന്നായി ഉയർന്ന് 43,302 ആയി. ആറുമാസത്തിനിടയിലെ ഏറ്റവും ഉയർന്ന നിരക്കാണ് ഇരുപത്തിനാലു മണിക്കൂറിനിടെ രേഖപ്പെടുത്തിയത്. ജനുവരി 15 ന് 55,761 പേർക്ക് അണുബാധ രേഖപ്പെടുത്തിയിരുന്നു. ജനുവരി എട്ടിന് രേഖപ്പെടുത്തിയ 68,053 ആണ് ഏറ്റവും ഉയർന്ന പ്രതിദിന കണക്ക്. വൈറസ് ബാധിച്ച് മരിച്ചവരുടെ എണ്ണവും ഇന്ന് ഒരാഴ്ചയ്ക്കുള്ളിൽ 48.5 ശതമാനം വർദ്ധിച്ച് 49 ആയി ഉയർന്നു. കഴിഞ്ഞ ബുധനാഴ്ച ഇത് 33 ആയിരുന്നു.
അതിവേഗം വളരുന്ന അണുബാധയുടെ വെളിച്ചത്തിൽ, തിങ്കളാഴ്ച ‘സ്വാതന്ത്ര്യദിനത്തിൽ’ നിയന്ത്രണങ്ങൾ ലഘൂകരിക്കുമ്പോൾ ഇൻഡോറിലും ഫേസ് മാസ്കുകൾ ധരിക്കുന്നത് തുടരണമെന്ന് വിദഗ്ധർ പൊതുജനത്തിന് മുന്നറിയിപ്പ് നൽകി. കേസുകൾ അതിവേഗം വർദ്ധിച്ചുകൊണ്ടിരിക്കുകയാണെന്ന് പബ്ലിക് ഹെൽത്ത് ഇംഗ്ലണ്ടിന്റെ മെഡിക്കൽ ഡയറക്ടർ ഡോ. യോൺ ഡോയ്ൽ പറഞ്ഞു. ഇത് പ്രതീക്ഷിച്ചതാണെന്നും, കൃത്യമായി നടന്നു വരുന്ന വാക്സിൻ റോൾ ഔട്ടിന് നന്ദി പറയുകയാണെന്നും അദ്ദേഹം പറഞ്ഞു. വാക്സിൻ എടുത്തിട്ടില്ലെങ്കിൽ ആദ്യത്തെയും രണ്ടാമത്തെയും ഡോസ് എത്രയും വേഗം ബുക്ക് ചെയ്യണമെന്നും അദ്ദേഹം പൊതുജനങ്ങളോട് അഭ്യർത്ഥിക്കുന്നു.
‘നിയന്ത്രണങ്ങൾ ഇപ്പോഴും നിലവിലുണ്ട്, അവ പിന്തുടരേണ്ടത് പ്രധാനമാണ്, തിങ്കളാഴ്ച അവ ഉയർത്തുമ്പോൾ നമ്മളെയും പ്രിയപ്പെട്ടവരെയും സംരക്ഷിക്കാൻ നമുക്കെല്ലാവർക്കും ഇനിയും നടപടികളുണ്ട്, ചുറ്റുമുള്ള സ്ഥലങ്ങളിൽ മാസ്ക് ധരിക്കുക, വീടിനകത്ത് അടുത്ത സമ്പർക്കം കുറയ്ക്കുക, രോഗലക്ഷണങ്ങളുണ്ടെങ്കിൽ പരിശോധന നടത്തുക, വീട്ടിൽ തന്നെ തുടരുക. ‘പാൻഡെമിക് അവസാനിച്ചിട്ടില്ല, നാമെല്ലാം ജാഗ്രത പാലിക്കണം.’ അദ്ദേഹം കുറിപ്പിൽ പറയുന്നു.
പതിനെട്ട് വയസ്സിന് മുകളിലുള്ള 35.2 ദശലക്ഷം (66.7 ശതമാനം) പേർക്ക് പൂർണമായി പ്രതിരോധ കുത്തിവയ്പ്പ് നടത്തിയതായി സർക്കാർ കണക്കുകൾ വ്യക്തമാക്കുന്നു. ഏകദേശം 46 ദശലക്ഷം (87.4 ശതമാനം) പേർക്ക് ആദ്യത്തെ ഡോസ് ലഭിച്ചിട്ടുണ്ട്.
സർക്കാരിന്റെ ലോക്ക്ഡൗൺ നിയന്ത്രണങ്ങൾ തിങ്കളാഴ്ച്ചയോടെ പൂർണ്ണമായും ഇല്ലാതാകും. നിയന്ത്രണങ്ങൾ നീക്കിയതിനെതിരെ സേജ് ശാസ്ത്രജ്ഞർ ഉൾപ്പെടയുള്ള വിദഗ്ദർ രംഗത്തെത്തിയിരുന്നു. നിയന്ത്രണങ്ങൾ പൂർണ്ണമായും ഇല്ലാതാകുന്നതോടെ കേസുകളുടെ എണ്ണവും ഇരട്ടിയാകുമെന്ന മുന്നറിയിപ്പാണ് വിദഗ്ദർ നൽകുന്നത്. ലണ്ടൻ ട്രാൻസ്പോർട്ടിന്റെ എല്ലാ മേഖലകളിലും ഫേസ് മാസ്കുകൾ നിർബന്ധമാക്കി മേയർ ഇന്നലെ ഉത്തരവിറക്കിയിരുന്നു. മറ്റിടങ്ങളിലും തികഞ്ഞ ജാഗ്രതാ നിർദ്ദേശമാണ് നൽകിയിട്ടുള്ളത്.
click on malayalam character to switch languages