ലണ്ടൻ: ഇന്ത്യൻ ഓവർസീസ് കോൺഗ്രസ്സിന്റെ നേതൃത്വത്തിൽ രാഹുൽ ഗാന്ധിക്ക് പിന്തുണ പ്രഖ്യാപിക്കുന്നതിനും, കേന്ദ്ര ബിജെപി സർക്കാർ രാഷ്ട്രീയ മുതലെടുപ്പിനായി നീതിന്യായ സ്ഥാപനങ്ങളെയും, ഗവ. മെഷിനറികളെയും ആയുധമാക്കുന്ന ജനാധിപത്യ വിരുദ്ധ നയങ്ങൾക്കെതിരെ ആഗോളതലത്തിൽ പ്രതിഷേധ സമ്മേളനങ്ങൾ നടത്തുവാനും ഐഒസി പദ്ധതിയിടുന്നു.
ആഗോള പ്രവാസി സമൂഹത്തിലെ ഏറ്റവും വലിയ പ്രസ്ഥാനവും, എഐസിസി യുടെ നിയന്ത്രണത്തിൽ ഉള്ള കോൺഗ്രസ്സ് അനുകൂല സംഘടനയുമായ ഐഒസി ശക്തമായ പ്രതിഷേധ പരിപാടികൾ നടത്തുന്നതിന് മുന്നോടിയായി ഇന്ന് (ശനിയാഴ്ച) ഉച്ചക്ക് സൂമിലൂടെ അന്താരാഷ്ട്ര തലത്തിൽ തന്നെ ഭാരവാഹികളുടെ മീറ്റിങ് വിളിച്ചു ചേർത്തിരിക്കുകയാണ്.
രാഹുൽ ഗാന്ധിക്ക് പിന്തുണ പ്രഖ്യാപിക്കുവാനും, ആവശ്യമായ നിയമ സഹായം നൽകുന്നതിനും, ഇന്ത്യയിൽ നടക്കുന്ന ജനാധിപത്യ-മതേതര വിരുദ്ധ ഭരണത്തെ ആഗോളതലത്തിൽ തന്നെ തുറന്നു കാണിക്കുന്നതിനും ശക്തമായ പ്രതിഷേധ പരിപാടികൾക്ക് ഇന്ന് നടക്കുന്ന യോഗം പദ്ധതിയിടും.
ഐഒസി ഗ്ലോബൽ ചെയർമാൻ ഡോ.സാം പിട്രോഡ, വൈസ് ചെയർമാൻ ജോർജ്ജ് അബ്രാഹം, പ്രസിഡണ്ട് മൊഹിന്ദർ സിങ് ഗിൽസിൻ, സെക്രട്ടറി രാജേന്ദർ ടിച്ച്പാലി, യു കെ പ്രസിഡണ്ട് കമൽ ദളിവാൾ, ഗുൽമന്ദർ സിങ് എഐസിസി പ്രതിനിധികളായ വീരേന്ദ്ര വശിഷ്ട, ആരതി കൃഷ്ണ, യു കെ കേരളഘടകം പ്രസിഡണ്ട് സുജു ഡാനിയേൽ, അജിത് മുതയിൽ, അനുരാ മത്തായി (ഗൾഫ്) ലിങ്ക് വിൻസ്റ്റർ (അയർലണ്ട്) സണ്ണി ജോസഫ് (ജർമ്മനി) അടക്കം ലോകത്തിന്റെ വിവിധ ഭാഗങ്ങളിൽ നിന്നും പ്രമുഖരായ നേതാക്കൾ പങ്കു ചേരും.
ആഴ്ചകൾക്കു മുമ്പ് ലണ്ടനിൽ ഐഒസി സംഘടിപ്പിച്ച യോഗത്തിൽ രാഹുൽ ഗാന്ധി പങ്കു ചേരുകയും, രാജ്യത്തിന്റെ ആപൽക്കരമായ സ്വേച്ഛാധിപത്യ ഭരണത്തിൽ നിന്നും മുക്തി പ്രാപിക്കേണ്ടതിന്റെ അനിവാര്യതക്കു അടിവരയിട്ടു സംസാരിച്ചു ഇന്ത്യയിൽ തിരിച്ചെത്തുമ്പോൾ ശക്തനായ പ്രതിപക്ഷ നേതാവിനെ തുറുങ്കിലടച്ചു നിശ്ശബ്ദനാക്കുവാനുള്ള കോടതി വിധിയൊരുക്കിയിരിക്കുന്നത് അത്യന്തം പ്രതിഷേധാർഹമാണെന്നു നേതാക്കൾ പറഞ്ഞു.
ഭാരത് ജോഡോ യാത്ര കടന്നുപോയ സമസ്ത സംസ്ഥാനങ്ങളിലും കണ്ട ജന സാഗര പിന്തുണയിൽ ഭയപ്പെട്ടു തടവിലടച്ചു നിശബ്ദനാക്കാം എന്ന തന്ത്രം പക്ഷെ ഭാരത ജനത അനുവദിക്കില്ലെന്ന് ഐഒസി നേതാക്കൾ പറഞ്ഞു. രാജ്യം രണ്ടു വ്യവസായികൾക്കായി തീറു കൊടുക്കുവാൻ കഴിയില്ലെന്നും, ബിജെപി ഇന്ത്യാ മഹാരാജ്യം വിറ്റു തുലക്കുകയാണെന്നും, ജനാതിപത്യ-മതേതര മൂല്യങ്ങൾ നഷ്ടപ്പെട്ടെന്നും ഐഒസി നേതാക്കൾ പറഞ്ഞു.
click on malayalam character to switch languages