അപ്പച്ചൻ കണ്ണഞ്ചിറ
ലണ്ടൻ: ഗ്രെയ്റ്റ് ബ്രിട്ടൻ സീറോ മലബാർ രൂപതയുടെ അഭിവന്ദ്യ അദ്ധ്യക്ഷൻ മാർ ജോസഫ് സ്രാമ്പിക്കലിന്റെ ‘അജപാലനത്തോടൊപ്പം സുവിശേഷവൽക്കരണം’ എന്ന ആല്മീയ ലക്ഷ്യം മുറുകെ പിടിച്ച് തന്റെ രൂപതയിൽ ആദ്ധ്യാൽമിക വളർച്ചക്കും നവോദ്ധാനത്തിനും, ദൈവീക അനുഗ്രഹങ്ങൾ ലഭ്യമാക്കുന്നതിൻറെയും ഭാഗമായി തിരുവചന ധ്യാനങ്ങൾ സംഘടിപ്പിക്കുന്നു. രൂപതയുടെ പ്രസ്തുത ബൈബിൾ കൺവെൻഷൻ ഏവർക്കും പങ്കു ചേരുവാനും ദൈവീക കൃപകൾക്ക് അവസരം ഒരുക്കുന്നത്തിനുമായി വചന ശുശ്രുഷ എട്ടു പ്രമുഖ കേന്ദ്രങ്ങളിൽ നടത്തുവാനുള്ള ഒരുക്കങ്ങൾ പുരോഗമിച്ചു വരികയാണ്.
സെഹിയോൻ ധ്യാനകേന്ദ്ര ഡയറക്ടറും,കാലഘട്ടത്തിലെ പരിശുദ്ധാൽമ ശുശ്രുഷകൾക്കു അനുഗ്രഹീത വരദാനം ലഭിച്ച തിരുവചന പ്രഘോഷകരിൽ പ്രശസ്തനുമായ സേവ്യർഖാൻ വട്ടായിൽ അച്ചനാണ് യു കെ യിൽ അഭിഷേകാഗ്നി ധ്യാനം ഈ വർഷം നയിക്കുക.
നവംബർ നാലിന് നടത്തപ്പെടുന്ന ലണ്ടനിലെ ബൈബിൾ കൺവെഷനോടെ റീജണൽ ധ്യാനങ്ങൾക്കു സമാപനം കുറിക്കപ്പെടും.ലണ്ടൻ റീജണൽ ബൈബിൾ കൺവെൻഷനായി അനുഗ്രഹ വേദി ഒരുക്കുക ഹെയർഫീൽഡ് സ്പോർട്സ് അക്കാഡമിയിലാണ്.
കായിക ക്ഷമത വർദ്ധിപ്പിക്കുന്ന ഫിറ്റ്നസ് സെന്ററുകളും, പരിശീലനം നൽകുന്ന ക്ലാസ്സുകളും, കായിക മാമാങ്കങ്ങൾക്കു സുപ്രസിദ്ധമായ ഗ്രൗണ്ടും സ്റ്റേഡിയങ്ങളും അന്നേ ദിവസം ആല്മീയ ക്ഷമതക്കും ആദ്ധ്യാൽമിക നവോത്ഥാനത്തിനുമുള്ള പരിശുദ്ധാൽമാവിന്റെ അഭിഷേക വേദിയാകും. അക്കാദമിയിലെ ഓഡിറ്റോറിയങ്ങൾ ഇദം പ്രഥമമായി തിരുവചനങ്ങൾക്ക് കാതോർക്കുവാൻ ഇരിപ്പിടം ഒരുക്കുമ്പോൾ ലണ്ടനിലുള്ള മൂന്നു ചാപ്ലിൻസികളിലെ കുർബ്ബാന കേന്ദ്രങ്ങളിൽ നിന്നായി എത്തുന്ന ആയിരങ്ങൾക്ക് അത് അഭിഷേകങ്ങൾക്കും അനുഗ്രഹങ്ങൾക്കും നവീകരണത്തിനും സാക്ഷ്യമേകും എന്ന് തീർച്ച.
അഭിഷേകാഗ്നി കൺവെൻഷനായി വിശാലമായ ഇരിപ്പിട സൗകര്യവും, സുഗമമായി തിരുവചന ശുശ്രുഷയിൽ പങ്കു ചേരുന്നതിനായുള്ള സംവിധാനങ്ങളും സ്പോർട്സ് അക്കാദമിയിൽ സംഘാടക സമിതി ഒരുക്കുന്നുണ്ട്.
റീജിയണൽ ബൈബിൾ കൺവെൻഷനുകളുടെ സമാപന ശുശ്രുഷ വലിയ വിജയം കാണുന്നതിനും,അനുഗ്രഹങ്ങളുടെ വേദിയാവുന്നതിനും മദ്ധ്യസ്ഥ പ്രാർത്ഥനകളും, ആല്മീയമായ ഒരുക്കങ്ങളും, ധ്യാനാർത്ഥികൾക്കു വേണ്ട സൗകര്യങ്ങൾ തയ്യാറാക്കലുമായി വോളണ്ടിയർ കമ്മിറ്റിയും മദ്ധ്യസ്ഥ പ്രാർത്ഥനാ സംഘവും, ഇതര കമ്മിറ്റികളും സദാ പ്രവർത്തന ക്ഷമമാണ്.
ജീവൻ തുടിക്കുന്ന തിരുവചനങ്ങൾ ആല്മീയ-മാനസിക നവീകരണത്തിനും, ജീവിത തീർത്ഥ യാത്രയിൽ നന്മയിൽ നയിക്കപ്പെടുന്നതിനും, ആല്മീയ കൃപാ ശക്തി പ്രാപ്യമാകുവാനും ഉതകുന്ന ഏറ്റവും വലിയ അനുഗ്രഹീത ശുശ്രുഷയായി ‘ബൈബിൾ കൺവെൻഷൻ 2018’ വേദിയാവുമ്പോൾ അതിലേക്കു ഏവരെയും സ്നേഹ പൂർവ്വം ക്ഷണിച്ചു കൊള്ളുന്നതായി ലണ്ടൻ റീജിയണൽ സംഘാടക സമിതിക്കായി ഫാ.ജോസ് അന്ത്യാംകുളവും, സംഘാടക സമിതിയും അറിയിക്കുന്നു.
ലണ്ടൻ റീജിയണൽ അഭിഷേകാഗ്നി കൺവെൻഷൻ നവംബർ 4 നു ഞായറാഴ്ച രാവിലെ 9 :30 മുതൽ വൈകുന്നേരം 5:00 വരെയാണ് ക്രമീകരിച്ചിരിക്കുന്നത്.
കൂടുതൽ വിവരങ്ങൾക്ക്
കൺവെൻഷൻ വേദിയുടെ വിലാസം:
Harefield Sports Academy, Northwood Way, Harefield UB9 6ET
click on malayalam character to switch languages