1 GBP = 103.92
Logo

ചെങ്കൽപേട്ടിൽ കത്തിക്കരിഞ്ഞ നിലയിൽ കണ്ടെത്തിയ മൃതദേഹം ജസ്‌നയുടേതല്ല

  • Jun 02, 2018
ചെങ്കൽപേട്ടിൽ കത്തിക്കരിഞ്ഞ നിലയിൽ കണ്ടെത്തിയ മൃതദേഹം ജസ്‌നയുടേതല്ല
കോട്ടയം: തമിഴ്നാട്ടിൽ കാഞ്ചീപുരം ചെങ്കൽപേട്ടിന് സമീപം പഴവേലിയിൽ കത്തിക്കരിഞ്ഞ നിലയിൽ കണ്ടെത്തിയ ജഡം രണ്ടുമാസം മുമ്പ് പത്തനംതിട്ടയിൽ നിന്ന് ദുരൂഹ സാഹചര്യത്തിൽ കാണാതായ ജസ്‌നയുടേതല്ല. ജസ്‌നയുടെ സഹോദരൻ ജെയ്സാണ് ഇക്കാര്യം മാദ്ധ്യമങ്ങളോട് വ്യക്തമാക്കിയത്. ഇന്ന് കേരള പൊലീസ് സംഭവസ്ഥലത്തെത്തി പരിശോധന നടത്തി. അതേസമയം, മൃതദേഹം ഡി.എൻ.എ ടെസ്റ്റ് നടത്തി വ്യക്തത വരുത്തുമെന്ന് തിരുവല്ല ഡിവൈ.എസ്.പി. ജയകുമാർ പറഞ്ഞു. തിരുവല്ല എസ്.ഐ വിനോദ്, വെച്ചൂച്ചിറ എസ്.ഐ. അഷറഫ്, പെരിനാട് സ്റ്റേഷനിലെ സീനിയർ പൊലീസ് ഓഫീസർമാരായ ബിജു മാത്യു, ലിജു എന്നിവരാണ് ചെങ്കൽപേട്ടിൽ എത്തിയത്.

ചെങ്കൽപേട്ടിൽ കത്തിക്കരിഞ്ഞ മൃതദേഹത്തിലെ പല്ലിൽ ക്ലിപ് ഇട്ടിട്ടുണ്ട്. ജസ്നയുടെ പല്ലിനും ക്ലിപ്പുണ്ട്. അതാണ് സംശയത്തിന് ഇടയാക്കിയത്. എന്നാൽ, ജസ്ന മൂക്കുത്തി ധരിച്ചിരുന്നില്ല. കത്തിക്കരിഞ്ഞ ജഡത്തിൽ മൂക്കുത്തിയുണ്ടായിരുന്നു. മൃതദേഹത്തിന് സമീപത്തുനിന്നും കണ്ടെത്തിയ സൂട്ട്കേസിലെ വസ്ത്രങ്ങൾ ജസ്നയുടേതാണോയെന്ന് പരിശോധിച്ചെങ്കിലും ജയ്സ് തിരിച്ചറിഞ്ഞില്ല. കണ്ടെത്തിയ മൃതദേഹത്തിന് ജസ്നയുടേതിനെക്കാൾ പ്രായം തോന്നിക്കും. ചെങ്കൽപേട്ടിലെ മെഡിക്കൽ കോളേജ് ആശുപത്രി മോർച്ചറിയിലാണ് മൃതദേഹം സൂക്ഷിച്ചിട്ടുള്ളത്.

വ്യാഴാഴ്ച രാത്രിയിലാണ് കത്തിക്കരിഞ്ഞ ജഡം തമിഴ്നാട് പൊലീസ് കണ്ടെത്തിയത്. ചാക്കിൽ കൊണ്ടുവന്ന എന്തോ രണ്ടുപേർ ചേർന്ന് കത്തിക്കുന്നതുകണ്ട് നൈറ്റ് പട്രോളിംഗ് സംഘം പരിശോധിക്കാനായി ജീപ്പ് നിറുത്തിയപ്പോൾ ഇവർ ഓടിപോവുകയായിരുന്നു. സംശയം തോന്നിയ പൊലീസ് വെള്ളം ഒഴിച്ച് തീ അണച്ചു. അപ്പോഴാണ് ഒരു സ്ത്രീയുടെ ജഡമാണെന്ന് മനസിലായത്. ഇതിനോടകം മുഖം ഉൾപ്പെടെ ശരീരഭാഗങ്ങൾ കത്തിക്കരിഞ്ഞിരുന്നു. പെട്രോളോ മറ്റോ ഒഴിച്ചശേഷമാണ് തീകൊളുത്തിയതെന്നാണ് കരുതുന്നത്.

മാർച്ച് 22നാണ് മകളെ കാണാനില്ലായെന്ന് കാട്ടി വെച്ചൂച്ചിറ മുക്കൂട്ടുതറ സന്തോഷ് കവലയിൽ കുന്നത്ത് വീട്ടിൽ ജയിംസ് ജോസഫ് പൊലീസിൽ പരാതി നല്കുന്നത്. ജസ്നയെ ആരെങ്കിലും തട്ടിക്കൊണ്ടുപോയതാകാമെന്ന് പിതാവ് പൊലീസിനോട് സൂചിപ്പിച്ചിരുന്നു. കാഞ്ഞിരപ്പള്ളി സെന്റ് ഡൊമിനിക് കോളേജിലെ രണ്ടാം വർഷ ബി.കോം വിദ്യാർത്ഥിനിയാണ് ജസ്ന. പിതാവിന്റെ സഹോദരിയുടെ വീട്ടിൽ പോവുന്നുവെന്ന് പറഞ്ഞാണ് ജസ്ന വീട്ടിൽനിന്നും പോയത്. എന്നാൽ അവിടെ എത്തിയിരുന്നില്ല. ഫോണും ആഭരണങ്ങളും വസ്ത്രങ്ങളും എടുക്കാതെയാണ് പോയത്. ജെസ്നയുടെ തിരോധാനവുമായി ബന്ധപ്പെട്ട് എന്തെങ്കിലും വിവരം നല്കുന്നവർക്ക് ഡി.ജി.പി അഞ്ചുലക്ഷം രൂപ പാരിതോഷികം പ്രഖ്യാപിച്ചിരുന്നു. അന്വേഷണ ചുമതല ഐ.ജി.മനോജ് എബ്രഹാമിന് കൈമാറുകയും ചെയ്തിരുന്നു. ബംഗളൂരുവിലും തൃശൂരിലും നേരത്തെതന്നെ ജസ്നയെ കണ്ടെത്താൻ പൊലീസ് ശ്രമിച്ചെങ്കിലും വിഫലമാവുകയായിരുന്നു. ജസ്നയെ അവസാനമായി കാണുന്നത് മുണ്ടക്കയം കന്നിമലയിൽ നിന്ന് ബസിൽ കയറുന്നതാണ്. സംസ്ഥാനത്തിനകത്തും പുറത്തുമായി പൊലീസ് അന്വേഷണം നടത്തുകയും ചെയ്തിരുന്നു.

Latest News:

Post Your Comments Here ( Click here for malayalam )

Press Esc to close

click on malayalam character to switch languages

other news

1 2 3 … 3,630
More Videos
കനത്ത കാറ്റിൽ ആടിയുലഞ്ഞ് ബോയിങ് 777ന്‍റെ ലാൻഡിങ്; ഞെട്ടിക്കുന്ന ദൃശ്യങ്ങൾVIDEO
More Gallery
ഇ​ന്ത്യ​യു​മാ​യി വീ​ണ്ടും ച​ർ​ച്ച​ക്ക്​ ത​യാ​ർ –ചൈ​ന

Latest Updates

show more

uukma special

show more